മുണ്ടത്തിക്കോട് വെടിക്കെട്ട് ദുരന്തം! ചിന്നിച്ചിതറിയ നിലയിലും ചാക്കുകളിൽ കെട്ടിയും മൃതദേഹങ്ങൾ ! ചുടു ചോരയിൽ കുതിർന്ന് തൃശ്ശൂർ മെഡിക്കൽ കോളേജ് പരിസരം

തൃശ്ശൂർ മുണ്ടത്തിക്കോടുണ്ടായ വെടിക്കെട്ടപകടം നാടിനെയാകെ കണ്ണീരിലാഴ്ത്തിയിരിക്കുകയാണ്. ഗവ. മെഡിക്കൽ കോളേജ് ആശുപത്രി വളപ്പിലെത്തിയ കാഴ്ചകൾ കഠിനഹൃദയരെ പോലും പിടിച്ചുലയ്ക്കുന്നതായിരുന്നു. ചിന്നിച്ചിതറിയ നിലയിലും ചാക്കുകളിൽ കെട്ടിയുമായിരുന്നു മൃതദേഹങ്ങൾ ആശുപത്രിയിലേക്ക് എത്തിച്ചത്. ചിലരുടെ ശരീരം പാതിയേ ഉണ്ടായിരുന്നുള്ളൂ. ആശുപത്രിയിലെത്തിയ ആംബുലൻസുകൾ ഓരോന്നായി തുറക്കുമ്പോൾ ജീവനുള്ളവരെ കണ്ടെത്താനുള്ള തത്രപ്പാടിലായിരുന്നു ആശുപത്രി അധികൃതർ. അഞ്ച് ആംബുലൻസുകൾ വരെ ഒരേസമയം ആശുപത്രി മുറ്റത്തെത്തിയപ്പോൾ മരവിച്ച അവസ്ഥയിലായിരുന്നു എല്ലാവരും. ആശുപത്രിയുടെ മുൻവശം രക്തം കൊണ്ട് ചുവന്നു.

തിരുവമ്പാടി വിഭാഗത്തിന്റെ വെടിക്കെട്ട് നിർമാണ കേന്ദ്രത്തിലാണ് സ്ഫോടനം നടന്നത്. ഇവിടെ 110 തൊഴിലാളികളാണ് ജോലി ചെയ്യുന്നത്. ഇതിൽ 40 ഓളം തൊഴിലാളികളാണ് ഇന്നലെ ജോലിക്ക് എത്തിയിരുന്നത്. ഉച്ചസമയമായതിനാൽ ഭക്ഷണത്തിന് ഓർഡർ നൽകിയിരുന്നു. സ്ഫോടനത്തിന് തൊട്ടുമുൻപ് ചിലർ പണി കഴിഞ്ഞ് മടങ്ങിയതും മറ്റു ചിലർ ചായ കുടിക്കാൻ പോയതും വലിയൊരു ദുരന്തത്തിന്റെ വ്യാപ്തി കുറച്ചെങ്കിലും, സ്ഥലത്തുണ്ടായിരുന്നവരുടെ അവസ്ഥ ദയനീയമാണ്. സ്ഫോടനസമയത്ത് വെടിക്കെട്ടുപുരയിലുണ്ടായിരുന്ന ലൈസൻസി സതീഷ് ഗുരുതരാവസ്ഥയിൽ മെഡിക്കൽ കോളേജിൽ ചികിത്സയിലാണ്.

അപകടസ്ഥലത്തെ സ്ഥിതി അതീവ ഗുരുതരമായതിനാൽ ആദ്യം പോലീസ് ഡ്രോൺ ഉപയോഗിച്ചാണ് പരിശോധന നടത്തിയത്. പിന്നീട് സ്ഫോടനം നിലച്ച ശേഷം അഗ്നിരക്ഷാസേന തീയണച്ചാണ് നേരിട്ട് തിരച്ചിൽ ആരംഭിച്ചത്. നേരം ഇരുട്ടിത്തുടങ്ങിയതോടെ ജനറേറ്ററുകൾ എത്തിച്ച് തെരച്ചിൽ കൂടുതൽ ഊർജിതമാക്കി. അപകടത്തിൽ തങ്ങളുടെ ബന്ധുക്കളുണ്ടോയെന്നറിയാൻ നൂറുകണക്കിനാളുകളാണ് മെഡിക്കൽ കോളേജിലെത്തിയത്. മണിക്കൂറുകൾക്ക് മുൻപ് കാണുകയോ സംസാരിക്കുകയോ ചെയ്തവർ മടങ്ങിയെത്തുമെന്ന പ്രതീക്ഷയോടെയുള്ള ബന്ധുക്കളുടെ കാത്തിരിപ്പ് വേദനിപ്പിക്കുന്ന കാഴ്ചയായിരുന്നു.

മരിച്ച പലരെയും തിരിച്ചറിയാൻ കഴിയാത്ത സാഹചര്യമാണുള്ളത്. ഡിഎൻഎ പരിശോധനയിലൂടെ മാത്രമേ കൃത്യമായ തിരിച്ചറിയൽ സാധ്യമാകൂ. അപകടത്തിൽപ്പെട്ടവരെയും മരിച്ചവരെയും കുറിച്ചുള്ള വിവരങ്ങൾ അറിയാനായി തൃശ്ശൂർ മെഡിക്കൽ കോളേജിൽ പ്രത്യേക കൺട്രോൾ റൂം തുറന്നു. അപകടസ്ഥലത്ത് ഇനിയും ആളുകൾ കുടുങ്ങിക്കിടപ്പുണ്ടോയെന്ന ആശങ്കയിൽ തിരച്ചിൽ തുടരുകയാണ്.