കണ്ണൂർ∙ എഡിഎം നവീൻ ബാബുവിന്റെ മരണത്തിൽ പ്രതിയായ കണ്ണൂർ മുൻ ജില്ലാ പഞ്ചായത്ത് പ്രസിഡന്റും സിപിഎം നേതാവുമായ പി.പി. ദിവ്യയെ പോലീസ് കസ്റ്റഡിയിൽ വിട്ട് കോടതി. കണ്ണൂർ ഒന്നാം ക്ലാസ് ജുഡീഷ്യൽ മജിസ്ട്രേട്ട് കോടതിയാണ് ദിവ്യയെ ഇന്ന് വൈകുന്നേരം 5 മണി വരെ ദിവ്യയെ പൊലീസ് കസ്റ്റഡിയിൽ വിട്ടത്. കേസിൽ കൂടുതലായി ചോദ്യം ചെയ്യണമെന്ന് ചൂണ്ടിക്കാട്ടി 2 ദിവസത്തെ കസ്റ്റഡി വേണമെന്ന് പോലീസ് കോടതിയിൽ ആവശ്യപ്പെട്ടിരുന്നെങ്കിലും കസ്റ്റഡി കാലാവധി ഇന്ന് വൈകുന്നേരം 5 മണി വരെ നിശ്ചയിക്കുകയായിരുന്നു. കണ്ണൂർ ടൗൺ പൊലീസ് സ്റ്റേഷനിലാണ് പി.പി. ദിവ്യയെ ഇന്ന് ചോദ്യം ചെയ്യുക.
അതേസമയം, പി.പി. ദിവ്യയുടെ ജാമ്യാപേക്ഷ ഈ മാസം അഞ്ചാം തീയതി പരിഗണിക്കും, ഇന്ന് ദിവ്യയെ വളരെ രഹസ്യമായാണ് കോടതിയിൽ ഹാജരാക്കിയത്. പുറത്തിറങ്ങിയ ദിവ്യയോട് എന്തെങ്കിലും പറയാനുണ്ടോയെന്ന് മാദ്ധ്യമ പ്രവർത്തകർ ചോദിച്ചെങ്കിലും ദിവ്യ പ്രതികരിച്ചില്ല.
