നവീൻ ബാബുവിന്റെ മരണം ! പി പി ദിവ്യ വൈദ്യപരിശോധനയ്ക്കായി ആശുപത്രിയിലേക്ക് മാറ്റി ; കരിങ്കൊടി പ്രതിഷേധവുമായി പ്രതിപക്ഷ സംഘടനകളും ബിജെപിയും

കണ്ണൂർ: എഡിഎം നവീൻ ബാബുവിന്റെ മരണത്തിൽ കസ്റ്റഡിയിലെടുത്ത പ്രതി പിപി ദിവ്യയെ വൈദ്യപരിശോധനയ്ക്കായി ജില്ലാ ആശുപത്രിയിലേക്ക് കൊണ്ട് പോയി. പരിശോധനയ്ക്കായി ദിവ്യയെ പുറത്തെത്തിച്ചപ്പോൾ പ്രതിപക്ഷ സംഘടനകളും ബിജെപി പ്രവർത്തകരും കരിങ്കൊടി കാണിക്കുകയും പ്രതിഷേധിക്കുകയും ചെയ്തു. അതേസമയം ദിവ്യ ഇന്ന് ജാമ്യഹർജി നൽകില്ലെന്ന് വിവരം. നാളെ തലശ്ശേരി സെഷൻസ് കോടതിയിൽ ജാമ്യ ഹർജി നൽകാനാണ് നീക്കം.

പോലീസും ദിവ്യയും തമ്മിലുള്ള ധാരണ പ്രകാരം ഒരു കേന്ദ്രത്തിലെത്തി ദിവ്യ കീഴടങ്ങിയെന്ന വിവരവും ഇപ്പോൾ പുറത്തു വരുന്നുണ്ട് .കീഴടങ്ങാനുള്ള യാത്രയ്ക്കിടെ ഇവരെ പോലീസ് കസ്റ്റഡിയിലെടുക്കുകയായിരുന്നുവെന്നായിരുന്നു നേരത്തെ പുറത്തു വന്നിരുന്ന വിവരം. കണ്ണൂർ കണ്ണപുരത്ത് ദിവ്യയുടെ വീടിന് സമീപത്തെ സ്ഥലത്ത് നിന്നാണ് കീഴടങ്ങിയത്.

ദിവ്യയോട് അടിയന്തിരമായി കീഴടങ്ങണമെന്ന് പാർട്ടി കേന്ദ്രങ്ങൾ ആവശ്യപ്പെട്ടിരുന്നു. ഒരാളുടെ പേരിൽ പഴി കേൾക്കാനാകില്ലെന്നും ഉപതെരഞ്ഞെടുപ്പുകളിൽ ഇത് തിരിച്ചടിയായേക്കുമെന്നും പാർട്ടി പറഞ്ഞതിന്റെ അടിസ്ഥാനത്തിലാണ് തന്നെ അറസ്റ്റ് ചെയ്യാനെത്തിയ പൊലീസ് ഉദ്യോഗസ്ഥരോട് താൻ കീഴടങ്ങാൻ തയ്യാറാണെന്ന് ദിവ്യ അറിയിച്ചത്. നവീൻ ബാബുവിന്റെ മരണവുമായി ബന്ധപ്പെട്ട കേസിൽ ദിവ്യ മാത്രമാണ് പ്രതി. ആത്മഹത്യാ പ്രേരണക്കുറ്റമാണ് പൊലീസ് ദിവ്യക്കെതിരെ ചുമത്തിയത്. ഇവരുടെ മുൻകൂർ ജാമ്യഹർജി ഇന്ന് കോടതി തള്ളിയിരുന്നു. എഡിഎം നവീൻ ബാബുവിനെ ജീവനൊടുക്കാൻ പ്രേരിപ്പിച്ചത് യാത്രയയപ്പ് യോഗത്തിലെ പിപി ദിവ്യയുടെ അധിക്ഷേപങ്ങളാണെന്നാണ് ദിവ്യക്കെതിരായ കേസ്. ദിവ്യക്കെതിരെ ചുമത്തിയ പ്രേരണാകുറ്റം ശരിവെക്കുന്ന മൊഴികളാണ് പൊലീസിനും ലഭിച്ചിരുന്നത്.