ദില്ലി വഖഫ് ബോർഡ് കേസ്; ആം ആദ്മി പാർട്ടി എംഎൽഎ അമാനത്തുള്ള ഖാനെതിരെ ഇഡി കുറ്റപത്രം

ദില്ലി: ദില്ലി വഖഫ് ബോർഡ് കേസിൽ കള്ളപ്പണം വെളുപ്പിച്ചെന്ന കേസിൽ ആം ആദ്മി പാർട്ടി എംഎൽഎ അമാനത്തുള്ള ഖാനെതിരെ എൻഫോഴ്സ്മെൻ്റ് ഡയറക്ടറേറ്റ് (ഇഡി) കുറ്റപത്രം സമർപ്പിച്ചു. ഓഖ്‌ല മേഖലയിലുള്ള 36 കോടി രൂപയുടെ ഭൂമിയുമായി ബന്ധപ്പെട്ട സാമ്പത്തിക ക്രമക്കേടുകളിലാണ് ഖാനെതിരായ കുറ്റപത്രം.

ഇഡി സമർപ്പിച്ച 110 പേജുള്ള അനുബന്ധ കുറ്റപത്രത്തിൽ, ദില്ലി വഖഫ് ബോർഡിൽ സാമ്പത്തിക ക്രമക്കേട് നടന്നതായും കള്ളപ്പണം വെളുപ്പിക്കൽ നടന്നതായും ആരോപണമുണ്ട്. ഇതിൽ മറിയം സിദ്ദിഖി എന്നയാളെയും പ്രതിചേർത്തിട്ടുണ്ട്. നവംബർ 4ന് ഈ കേസ് കോടതി പരിഗണിച്ചേക്കുമെന്നാണ് ലഭ്യമായ സൂചന.

2016-ൽ സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) ദില്ലി വഖഫ് ബോർഡിലെ ക്രമക്കേടുകളെ കുറിച്ച് അന്വേഷണം ആരംഭിച്ചു. അന്നത്തെ വഖഫ് ബോർഡ് ചെയർമാൻ അമാനത്തുള്ള ഖാനായിരുന്നു. ഇക്കഴിഞ്ഞ സെപ്റ്റംബർ 2ന് ഇഡി അമാനത്തുള്ള ഖാനെ അറസ്റ്റ് ചെയ്തിരുന്നു.