‘അതിർത്തിയിലെ ശത്രുക്കൾ മാത്രം പോരാ, ഉള്ളിലെ വെല്ലുവിളികളെയും നേരിടണം’; ചെങ്കോട്ടയിൽ നരേന്ദ്ര മോദിയുടെ വമ്പൻ പ്രഖ്യാപനം, 2047ലെ വികസിത ഭാരതത്തിനായി ‘സപ്തധാര’!

ദില്ലി: രാജ്യത്തെ സായുധ നക്‌സലിസത്തെ വനമേഖലകളിൽ നിന്ന് നിർവീര്യമാക്കിയെങ്കിലും, ‘മനസ്സുകൊണ്ട് നക്‌സലുകളായവർ’ ഇപ്പോഴും അധികാരത്തിന്റെ ഇടനാഴികളിൽ ഉണ്ടെന്ന് പ്രധാനമന്ത്രി നരേന്ദ്രമോദി. ഇത്തരം പ്രത്യയശാസ്ത്ര നക്‌സലൈറ്റുകളെ തിരിച്ചറിഞ്ഞ് ഒറ്റപ്പെടുത്തണമെന്നും രാജ്യത്തിന്റെ വികസനത്തിന് തടസ്സമാകുന്ന ശക്തികളെ നേരിടണമെന്നും അദ്ദേഹം ആഹ്വാനം ചെയ്തു. 80-ാം സ്വാതന്ത്ര്യദിനത്തോടനുബന്ധിച്ച് ചെങ്കോട്ടയിൽ രാജ്യത്തെ അഭിസംബോധന ചെയ്യുകയായിരുന്നു പ്രധാനമന്ത്രി.

അക്രമത്തിന്റെയും അരാജകത്വത്തിന്റെയും പാത പുനരുജ്ജീവിപ്പിക്കാൻ ഇത്തരം ശക്തികൾ അവസരങ്ങൾക്കായി കാത്തിരിക്കുകയാണെന്ന് മോദി പറഞ്ഞു. നക്‌സലിസം നിരവധി യുവാക്കളുടെ ഭാവി നശിപ്പിച്ചുവെന്നും മാവോയിസത്തിനെതിരായ പോരാട്ടത്തിൽ 3,500-ലധികം സുരക്ഷാ ഉദ്യോഗസ്ഥർ കൊല്ലപ്പെട്ടിട്ടുണ്ടെന്നും അദ്ദേഹം ചൂണ്ടിക്കാട്ടി. രാജ്യത്തിന്റെ സുരക്ഷ എല്ലാവരുടെയും കൂട്ടായ ഉത്തരവാദിത്വമാണെന്നും അദ്ദേഹം വ്യക്തമാക്കി.

യുദ്ധം ഇനി അതിർത്തികളിൽ മാത്രം ഒതുങ്ങുന്നില്ലെന്നും പുതിയ തരത്തിലുള്ള ആക്രമണങ്ങൾ റിഫൈനറികൾ, ബാങ്കിംഗ് മേഖല, ഡാറ്റാ സെന്ററുകൾ, അടിസ്ഥാന സൗകര്യങ്ങൾ, ഫാക്ടറികൾ എന്നിവയെ ലക്ഷ്യമിടാമെന്നും പ്രധാനമന്ത്രി മുന്നറിയിപ്പ് നൽകി. രാജ്യത്തിന്റെ നിർണായക അടിസ്ഥാന സൗകര്യങ്ങളെ സംരക്ഷിക്കുന്നതിനായി ‘മിഷൻ സുദർശൻചക്ര’യുടെ പ്രവർത്തനങ്ങൾ വേഗത്തിൽ പുരോഗമിക്കുകയാണെന്നും അദ്ദേഹം പറഞ്ഞു.

വികസിത ഭാരതത്തിനായി ‘സപ്തധാര’

2047ഓടെ വികസിതവും സ്വാശ്രയവുമായ ഭാരതം എന്ന ലക്ഷ്യം കൈവരിക്കുന്നതിനായി രാജ്യത്തിന്റെ അടുത്ത വളർച്ചാ ഘട്ടത്തിന് ഏഴ് പ്രധാന മേഖലകൾ പ്രധാനമന്ത്രി മുന്നോട്ടുവച്ചു. ഉൽപ്പാദനം, കൃഷിയും ഭക്ഷ്യസുരക്ഷയും, സാങ്കേതികവിദ്യയും നവീകരണവും, ഗതി ശക്തി, രക്ഷാ ശക്തി, ഹരിത ഊർജം, സോഫ്റ്റ് പവർ എന്നിവയാണ് ‘സപ്തധാര’യായി അദ്ദേഹം അവതരിപ്പിച്ചത്.

ഉൽപ്പാദന മേഖലയിൽ ഇന്ത്യ സമ്പൂർണ്ണ ഉൽപ്പന്നങ്ങളുടെ നിർമ്മാണത്തിലേക്ക് കൂടുതൽ ശ്രദ്ധ കേന്ദ്രീകരിക്കണമെന്ന് മോദി പറഞ്ഞു. ആഗോള വിതരണ ശൃംഖലയിൽ പ്രധാന പങ്കാളിയാകാൻ ചെലവ്, ഗുണനിലവാരം, ഉൽപ്പാദനത്തിന്റെ വലുപ്പം എന്നിവയിൽ ഊന്നൽ നൽകണമെന്നും അദ്ദേഹം ആവശ്യപ്പെട്ടു.

കൃഷിയും ഭക്ഷ്യസുരക്ഷയും വികസനത്തിന്റെ നിർണായക ഘടകങ്ങളാണെന്ന് പ്രധാനമന്ത്രി വ്യക്തമാക്കി. കാർഷിക ഉൽപ്പാദനക്ഷമത വർധിപ്പിക്കുകയും ഭക്ഷ്യസുരക്ഷ ഉറപ്പാക്കുകയും ചെയ്യേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.

സാങ്കേതികവിദ്യയിലും നവീകരണത്തിലും ഇന്ത്യ ആഗോള കേന്ദ്രമായി മാറണമെന്നും മോദി പറഞ്ഞു. ഡാറ്റാ സെന്ററുകൾ, റോബോട്ടിക്സ്, ഉയർന്നുവരുന്ന സാങ്കേതികവിദ്യകൾ എന്നിവയുടെ കാലത്ത് ഇന്ത്യൻ സാങ്കേതിക ശേഷി കൂടുതൽ ശക്തിപ്പെടുത്തേണ്ടതുണ്ടെന്നും അടുത്ത തലമുറ ടെലികമ്മ്യൂണിക്കേഷൻ സാങ്കേതികവിദ്യകളിൽ മുന്നേറണമെന്നും അദ്ദേഹം ആവശ്യപ്പെട്ടു.

റോഡുകൾ, ഹൈവേകൾ, എക്‌സ്പ്രസ് വേകൾ എന്നിവ ഉൾപ്പെടെയുള്ള അടിസ്ഥാന സൗകര്യ വികസനവും വേഗത്തിലുള്ള കണക്റ്റിവിറ്റിയും സാമ്പത്തിക വളർച്ചയ്ക്ക് നിർണായകമാണെന്ന് പ്രധാനമന്ത്രി പറഞ്ഞു. പ്രതിരോധ മേഖലയിൽ ആഭ്യന്തര ഉൽപ്പാദനം ശക്തിപ്പെടുത്തി ഇറക്കുമതി ആശ്രിതത്വം കുറയ്ക്കണമെന്നും ഡ്രോൺ, കൗണ്ടർ-ഡ്രോൺ ഉൾപ്പെടെയുള്ള പ്രതിരോധ സാങ്കേതികവിദ്യകളിൽ കൂടുതൽ നിക്ഷേപം വേണമെന്നും അദ്ദേഹം വ്യക്തമാക്കി.

ഹരിത ഊർജ മേഖലയിലെ നവീകരണവും പുനരുപയോഗ ഊർജത്തിന്റെ വ്യാപനവും ഇന്ത്യയുടെ ഭാവി വളർച്ചയിൽ പ്രധാനമാണെന്നും മോദി പറഞ്ഞു. അതേസമയം യോഗ, കരകൗശലം, സിനിമ, ആനിമേഷൻ, ഗെയിമിംഗ്, ഡിജിറ്റൽ ഉള്ളടക്കം, ടൂറിസം തുടങ്ങിയ മേഖലകളിലൂടെ ഇന്ത്യയുടെ സോഫ്റ്റ് പവർ ലോകത്തിന് മുന്നിൽ കൂടുതൽ ശക്തമായി അവതരിപ്പിക്കണമെന്നും അദ്ദേഹം ആഹ്വാനം ചെയ്തു.

യുവാക്കൾക്ക് എഐ പരിശീലനം
അടുത്ത ഒരു വർഷത്തിനുള്ളിൽ ഒരു കോടി യുവാക്കൾക്ക് ആർട്ടിഫിഷ്യൽ ഇന്റലിജൻസ് നൈപുണ്യത്തിൽ പരിശീലനം നൽകുമെന്ന് പ്രധാനമന്ത്രി പ്രഖ്യാപിച്ചു. വിവിധ മത്സരപ്പരീക്ഷകൾക്കായി വിദ്യാർത്ഥികൾക്ക് സൗജന്യ ഓൺലൈൻ കോച്ചിംഗ് നൽകുമെന്നും അദ്ദേഹം അറിയിച്ചു. യുവാക്കളാണ് വികസിത ഭാരതത്തിന്റെ നിർമാണത്തിൽ നിർണായക ശക്തിയെന്നും അദ്ദേഹം പറഞ്ഞു.

രാജ്യത്ത് കഴിഞ്ഞ 12 വർഷത്തിനിടെ 650 പുതിയ സർവകലാശാലകൾ സ്ഥാപിച്ചതായും ഇപ്പോൾ 850 മെഡിക്കൽ കോളേജുകളുണ്ടെന്നും മോദി പറഞ്ഞു. യുവാക്കൾക്കിടയിൽ നവീകരണവും സാങ്കേതിക താൽപര്യവും വളർത്തുന്നതിനായി 10,000ത്തിലധികം അടൽ ടിങ്കറിംഗ് ലാബുകൾ സ്ഥാപിക്കുമെന്നും അദ്ദേഹം വ്യക്തമാക്കി. ഇന്ത്യയിൽ 2.5 ലക്ഷത്തിലധികം രജിസ്റ്റർ ചെയ്ത സ്റ്റാർട്ടപ്പുകളുണ്ടെന്നും അദ്ദേഹം ചൂണ്ടിക്കാട്ടി.

2047ഓടെ ‘വികസിത് ഭാരത്’ എന്ന ലക്ഷ്യം കൈവരിക്കാൻ സർക്കാർ പദ്ധതികൾക്കൊപ്പം പൗരന്മാരുടെ പങ്കാളിത്തവും അനിവാര്യമാണെന്ന സന്ദേശത്തോടെയാണ് പ്രധാനമന്ത്രി പ്രസംഗം അവസാനിപ്പിച്ചത്. ദേശീയ താൽപ്പര്യവും കടമയും ഓരോ പൗരന്റെയും തിരിച്ചറിയലായി മാറണമെന്നും അദ്ദേഹം ആഹ്വാനം ചെയ്തു.രാജ്യത്തിന്റെ സുരക്ഷയും സ്വാശ്രയത്വവും ഉറപ്പാക്കുന്നതിനൊപ്പം സമ്പദ്‌വ്യവസ്ഥ, സാങ്കേതികവിദ്യ, യുവശക്തി, ഹരിത ഊർജം, സോഫ്റ്റ് പവർ എന്നിവയെ ഒരുമിച്ച് മുന്നോട്ട് കൊണ്ടുപോകുകയാണ് 2047ലെ വികസിത ഭാരതത്തിലേക്കുള്ള ലക്ഷ്യം.