കൊച്ചി കപ്പൽ ശാലയിലെ വിവരച്ചോർച്ച പഴുതടച്ച അന്വേഷണത്തിന് കേന്ദ്ര ഏജൻസികൾ; എയ്ഞ്ചൽ പായലിനെ കണ്ടെത്താൻ ഊർജ്ജിത നീക്കം; കേസന്വേഷണം എൻ ഐ എ ഏറ്റെടുത്തേയ്ക്കുമെന്ന് സൂചന

ദില്ലി: കൊച്ചി കപ്പൽ ശാലയിലെ വിവരങ്ങൾ ചോർന്ന കേസിൽ പഴുതടച്ച അന്വേഷണത്തിന് തയ്യാറെടുത്ത് കേന്ദ്ര ഏജൻസികൾ. വിഷയം അതീവ ഗുരുതരമെന്നാണ് കേന്ദ്ര സർക്കാരിന്റെ വിലയിരുത്തൽ. ഐ എൻ എസ് വിക്രാന്ത് അടക്കമുള്ള യുദ്ധക്കപ്പലുകളുടെ ചിത്രങ്ങൾ ചോർന്നു എന്നാണ് സൂചന. കപ്പൽ ശാലയിലെ താൽക്കാലിക ജീവനക്കാരനെ നേരത്തെ അറസ്റ്റ് ചെയ്‌തിരുന്നു. എയ്ഞ്ചേൽ പായൽ എന്ന സാമൂഹിക മാദ്ധ്യമ അക്കൗണ്ടിലേക്കാണ് വിവരങ്ങൾ നൽകിയതെന്ന് കണ്ടെത്തിയിട്ടുണ്ട്. ഈ അക്കൗണ്ടിന് പിന്നിൽ ആരാണ് എന്നതാണ് ഇപ്പോൾ അന്വേഷിക്കുന്നത്.

രാജ്യത്തെ തന്നെ അതീവ സുരക്ഷാ പട്ടികയിലുള്ള കപ്പൽ ശാലകളിൽ ഒന്നാണ് കൊച്ചി കപ്പൽശാല. അവിടെയുണ്ടായ വിവര ചോർച്ചയ്ക്ക് ഭീകര ബന്ധമുണ്ടോ എന്നാണ് ഇപ്പോൾ പരിശോധിക്കുന്നത്. കേസ് എൻ ഐ എ ഏറ്റെടുത്തേക്കും എന്നാണ് സൂചന.