മന്ത്രിമാർക്കും ഉപദേശകർക്കും ഇനി ശമ്പളമില്ല ! കാറുകളും മറ്റാനുകൂല്യങ്ങളും തിരിച്ചെടുക്കും; കടുത്ത സാമ്പത്തിക പ്രതിസന്ധി തരണം ചെയ്യാൻ ശമ്പളം തടഞ്ഞ് 200 മില്യൺ രൂപ ലാഭിക്കാൻ പാകിസ്ഥാൻ

ഇസ്ലാമബാദ്: കടുത്ത സാമ്പത്തിക പ്രതിസന്ധിയിൽ നിന്ന് കരകയറാൻ നടപ്പിലാക്കുന്ന ചെലവ് ചുരുക്കൽ നടപടികളുടെ ഭാഗമായി ഇനി മുതൽ മന്ത്രിമാർക്കും അവരുടെ ഉപദേശകർക്കും ശമ്പളം തടഞ്ഞ് പാക് സർക്കാർ. ശമ്പളവും ആഡംബര കാറുകളും, വിമാനയാത്രയും, മറ്റെല്ലാ ആനുകൂല്യങ്ങളും തിരിച്ചെടുക്കുമെന്നും ഇതുവഴി പ്രതിവർഷം 200 മില്യൺ പാകിസ്ഥാനി രൂപ ലാഭിക്കുമെന്നും പാക് പ്രധാനമന്ത്രി ഷെഹ്ബാസ് ഷെരീഫ് അറിയിച്ചു. എല്ലാ പ്രവിശ്യാ സർക്കാരുകളെയും തീരുമാനം അറിയിച്ചുകഴിഞ്ഞതായി ബുധനാഴ്ച്ച നടന്ന മന്ത്രിസഭായോഗത്തിനു ശേഷം പ്രധാനമന്ത്രി മാദ്ധ്യമപ്രവർത്തകരോട് പറഞ്ഞു.

മന്ത്രിമാർക്കായി ആഡംബര വസ്തുക്കളുടെ ഇറക്കുമതി, ഔദ്യോഗിക വാഹനങ്ങൾ വാങ്ങൽ, വിദേശയാത്ര, പഞ്ചനക്ഷത്ര ഹോട്ടലുകളിലെ താമസം തുടങ്ങിയവയെല്ലാം നിരോധിക്കും. ഇത്തരം നടപടികൾ വഴി ലാഭിക്കുന്ന തുക പ്രതിസന്ധിക്ക് പരിഹാരമാകില്ലെങ്കിലും ജനങ്ങളോടുള്ള പ്രതിബദ്ധത വർധിപ്പിക്കുന്നതിന് ഇത് അത്യാവശ്യമാണെന്ന് പാക്‌സർക്കാർ അറിയിച്ചു. പാചക വാതകവും, വൈദ്യുതിയും ലാഭിക്കാനായി സർക്കാർ ഓഫീസുകളുടെ പ്രവർത്തനം രാവിലെ 07:30 മുതലാരംഭിക്കാൻ നേരത്തെ സർക്കാർ ഉത്തരവിട്ടിരുന്നു. സാമ്പത്തിക പ്രതിസന്ധിയിൽ നിന്ന് കരകയറാൻ ഐ എം എഫ് ധനസാഹായം ലക്ഷ്യമിട്ടുകൊണ്ടുള്ള കടുത്ത സാമ്പത്തിക നിയന്ത്രണങ്ങൾ ഏർപ്പെടുത്തുകയാണ് പാക് സർക്കാർ