ഞാൻ മരിച്ചിട്ടില്ല’, കൊല്ലപ്പെട്ടെന്നത് വ്യാജ വാർത്ത; നിഷ ദഹിയയുടെ വീഡിയോ കണ്ട് ഞെട്ടി ആരാധകർ

ചണ്ഡിഗഡ്: അജ്ഞാതരുടെ ആക്രമണത്തില്‍ കൊല്ലപ്പെട്ട വാര്‍ത്ത വ്യാജമെന്ന് ദേശീയ വനിതാ ഗുസ്തി താരം നിഷാ ദഹിയ (Nisha Dahiya). ദേശീയ മാധ്യമങ്ങളിൽ ഉൾപ്പെടെ വാർത്തകൾ വന്നതിനു പിന്നാലെയാണ് താരം വിശദീകരണവുമായി രംഗത്തെത്തിയത്. താൻ സുരക്ഷിതയാണെന്ന് പറയുന്ന നിഷ ദഹിയയുടെ വീഡിയോ റസ്‌ലിങ് ഫെഡറേഷൻ ഓഫ് ഇന്ത്യ പുറത്തുവിട്ടു. ദേശീയ സീനിയർ മത്സരങ്ങൾക്കായി താൻ ഗോണ്ടയിലാണെന്ന് നിഷ വിഡിയോയിൽ വ്യക്തമാക്കി.

‘ദേശീയ സീനിയർ ചാംപ്യൻഷിപ്പിനായി നിലവിൽ ഗോണ്ടയിലാണ് ഞാൻ. എനിക്ക് യാതൊരു കുഴപ്പവും സംഭവിച്ചിട്ടില്ല. എല്ലാം വ്യാജ വാർത്തകളാണ്. ഞാൻ സുഖമായിരിക്കുന്നു.’ – നിഷ വ്യക്തമാക്കി. ഗുസ്തി താരവും സഹോദരനും വെടിയേറ്റ് മരിച്ചെന്നായിരുന്നു പുറത്തുവന്ന വാർത്ത. ഹരിയാനയിലെ സോനിപത്തിൽ നിന്നായിരുന്നു ആക്രമണം നേരിട്ടത്തെന്നും നിഷയുടെ അമ്മയ്ക്ക് ഗുരുതര പരിക്കേറ്റിട്ടുണ്ടെന്നുമായിരുന്നു വാർത്ത.