വഴങ്ങാതെ രക്ഷയില്ല!!! ന്യൂനപക്ഷ സമൂഹങ്ങളുടെ സംരക്ഷണം ഉറപ്പുവരുത്തും; ഒടുവിൽ മുട്ടുമടക്കി ഇമ്രാൻ ഖാൻ ഭരണകൂടം

അമൃത്സർ: പാകിസ്ഥാനിൽ ന്യൂനപക്ഷങ്ങൾ (Pakistan Government) കൊടിയ പീഡനങ്ങളാണ് നേരിട്ടുകൊണ്ടിരിക്കുന്നത്. ഇതിനെതിരെ ഇന്ത്യയുൾപ്പെടെയുളള രാജ്യങ്ങൾ ശക്തമായി തന്നെ രംഗത്തുവന്നിരുന്നു. ഒടുവിലിതാ ഇനിയും വഴങ്ങാതെ രക്ഷയില്ലായെന്നു ഇമ്രാൻ ഭരണകൂടത്തിന് മനസിലായിരിക്കുകയാണ്. മതന്യൂനപക്ഷങ്ങൾക്കെതിരായ പീഡനത്തിന് പരിഹാരവുമായി രംഗത്തുവന്നിരിക്കുകയാണ്
പാകിസ്ഥാനിലെ പ്രവിശ്യാ സർക്കാർ.

പാകിസ്ഥാനിലെ സിന്ധ്-ഖൈബർ പ്രവിശ്യകളിലെ പ്രാദേശിക സർക്കാരാണ് വർദ്ധിച്ചുവരുന്ന മതപീഡനങ്ങളും ആക്രമണങ്ങളും തടയാനൊരുങ്ങുന്നത്. പ്രത്യേക സുരക്ഷാ സേനയെ വിന്യസിച്ചുകൊണ്ടാണ് പ്രശ്‌നപരിഹാരത്തിന് ശ്രമം നടക്കുന്നത്. 2015ൽ സുപ്രീംകോടതി പുറപ്പെടുവിച്ച നിർദ്ദേശപ്രകാരമാണ് പ്രത്യേക സുരക്ഷാ സേനാ വിഭാഗം സിന്ധ് പ്രവിശ്യയിലെ ആരാധനാലയ സംരക്ഷണത്തിനായി നിയോഗിക്കപ്പെട്ടത്. സിന്ധ് പ്രവിശ്യയിൽ പതിറ്റാണ്ടുകളായി സിഖ്-ഹിന്ദു-ക്രിസ്ത്യൻ വിഭാഗങ്ങൾക്കും ആരാധനാലയങ്ങൾക്കും നേരെ കനത്ത ആക്രമണമാണ് മതമൗലികവാദികൾ നടത്തുന്നത്.

ഹൈന്ദവ ക്ഷേത്രങ്ങളും സിഖ് ഗുരുദ്വാരകളും പള്ളികളും തകർത്തുകൊണ്ടാണ് അക്രമികൾ അഴിഞ്ഞാടുന്നത്. പാർലമെന്റിൽ വലിയ ഒച്ചപ്പാടുണ്ടാക്കിയ പ്രശ്‌നത്തിൽ ഭരണകക്ഷിയായ തെഹരീക്-ഇ-ഇൻസാഫ് അംഗം ലാൽ ചന്ദ് മാൽഹിയാണ് മതന്യൂനപക്ഷങ്ങളുടെ സംരക്ഷണത്തിനായി ശക്തമായി രംഗത്ത് വന്നത്. ന്യൂനപക്ഷ സമൂഹം പാകിസ്താനിൽ വളരെ കുറവാണെന്നും അവരെ ഉന്മൂലനം ചെയ്യാനുള്ള ശ്രമത്തിന് ഭരണകൂടം ഒരു കാരണവശാലും കൂട്ടുനിൽക്കരുതെന്നും ലാൽ ചന്ദ് മാൽഹി ആവശ്യപ്പെട്ടിരുന്നു. 5000 പേരടങ്ങുന്ന സംഘമാണ് സുരക്ഷാ സേനയിലുള്ളത്. സിന്ധ് പ്രവിശ്യക്കുപുറമേ ഖൈബർ പഖ്തൂൺഖ്വായിലും സുരക്ഷാ സേനകളുടെ സേവനം ലഭിക്കും.