പാലാ സീറ്റ് ജോസ് കെ മാണിയ്ക്ക് നല്‍കിയാല്‍ മുന്നണി വിടും; വിട്ടു വീഴ്ചയില്ലാതെ മാണി സി കാപ്പനും എന്‍സിപിയും

കൊച്ചി: പാലാ സീറ്റ് ജോസ് കെ മാണിയ്ക്ക് നല്‍കിയാല്‍ മുന്നണി വിടുമെന്ന് മാണി സി കാപ്പന്‍. അതേസമയം ഇതുസംബന്ധിച്ച് എന്‍സിപി സംസ്ഥാന നേതൃയോഗം ഇന്ന് കൊച്ചിയില്‍ ചേരും. വരുന്ന നിയമസഭ തെരഞ്ഞെടുപ്പില്‍ പാലാ സീറ്റ് എന്‍സിപിയില്‍ നിന്നും ജോസ് കെ മാണി വിഭാഗത്തിന് സിപിഎം കൈമാറിയേക്കുമെന്ന സൂചനകള്‍ക്കിടെയാണ് യോഗം ചേരുന്നത്.

അതേസമയം പാലായുടെ പേരില്‍ കടുത്ത നിലപാട് സ്വീകരിച്ച്‌ സിപിഎമ്മുമായി അകലുന്നത് ബുദ്ധിയല്ലെന്നാണ് മന്ത്രി സഭയിലെ എന്‍സിപി പ്രതിനിധി എകെ ശശീന്ദ്രന്റെ അഭിപ്രായം. അതിനാല്‍ ഇത്തരമൊരു ചര്‍ച്ച പോലും ഇപ്പോള്‍ വേണ്ടന്നാണ് സംസ്ഥാന നേതൃത്വത്തിന്റെ നിലപാട്. സിപിഎം പാലാ സീറ്റ് ജോസ് കെ മാണിക്ക് നല്‍കിയാല്‍ മുന്നണി വിടുമെന്ന നിലപാടിലാണ് ഇവരും. അങ്ങനെ വന്നാല്‍ യുഡിഎഫ് പിന്തുണയോടെ പാലായില്‍ തന്നെ മത്സരിക്കണം. എന്നാല്‍ പാലാ സീറ്റിന്റെ കാര്യത്തില്‍ ഒരു വിട്ടു വീഴ്ചയ്ക്കും ഇല്ലെന്ന നിലപാടിലാണ് മാണി സി കാപ്പനും എന്‍സിപിയിയിലെ ഒരു വിഭാഗവും.

ഈ നീക്കം എന്‍സിപിയിലെ ഒരു വിഭാഗം ശക്തമാക്കുന്ന സാഹചര്യത്തിലാണ് പാര്‍ട്ടി നേതൃയോഗം ചേരുന്നത്. എന്‍സിപി ദേശീയ നേതൃത്വവും പാലാ സീറ്റ് വിട്ടുകൊടുക്കരുതെന്ന നിലപാടിലാണ്. എന്നാല്‍ പാലാ സീറ്റ് ജോസ് കെ മാണിക്ക് നല്‍കണമെന്ന് സിപിഎം ഇതുവരെ ആവശ്യപ്പെട്ടിട്ടില്ലെന്നാണ് സൂചന.