പാലക്കാട്: പീഡന ശ്രമം തടഞ്ഞ യുവതിക്ക് വെട്ടേറ്റു. പാലക്കാട് കഞ്ചിക്കോട് കൊട്ടില്പ്പാറ സ്വദേശിനിക്കാണ് മുഖത്ത് വെട്ടേറ്റത്. പ്രദേശവാസിയായ സൈമണ് എന്നയാളാണ് യുവതിയെ ആക്രമിച്ചത്. ബഹളംകേട്ട് സമീപവാസികള് ഓടിയെത്തുന്നത് കണ്ട് ഓടി രക്ഷപ്പെട്ട പ്രതി ഒളിവിലാണ്. ഇയാൾക്കായുള്ള തെരച്ചിൽ തുടരുകയാണ്.
ഇന്ന് രാവിലെ 11 മണിയോടെയായിരുന്നു സംഭവം. അമ്മയ്ക്കൊപ്പം തോട്ടത്തില് പുല്ലരിയാന് വന്നതായിരുന്നു യുവതി. കുറച്ചു സമയത്തിന് ശേഷം അമ്മ ചായയെടുക്കാനായി വീട്ടിലേക്ക് മടങ്ങി. ഈ തക്കത്തിനാണ് കുറ്റിക്കാടിന് സമീപം ഒളിച്ചിരുന്ന സൈമണ് യുവതിയെ ആക്രമിച്ചത്. പ്രതി കടന്നുപിടിക്കാനും പീഡിപ്പിക്കാനും ശ്രമിച്ചപ്പോള് യുവതി ചെറുത്തുനിന്നു. ഇതിനിടെയാണ് യുവതിയുടെ കൈയിലുണ്ടായിരുന്ന കത്തി പിടിച്ചുവാങ്ങി പ്രതി ആക്രമിച്ചത്. യുവതിയുടെ മുഖത്താണ് വെട്ടേറ്റത്.
പരിക്കേറ്റ യുവതിയെ ആദ്യം പാലക്കാട്ടെ സ്വകാര്യ ആശുപത്രിയിലെത്തിച്ച് ചികിത്സനല്കി. യുവതി അപകടനില തരണംചെയ്തതായാണ് ലഭിക്കുന്ന വിവരം. വിദഗ്ധചികിത്സയ്ക്കായി യുവതിയെ പിന്നീട് തൃശ്ശൂര് മെഡിക്കല് കോളേജ് ആശുപത്രിയിലേക്ക് മാറ്റി.
