അധികാരസ്ഥാനങ്ങളിൽ നിന്നും അകലം പാലിച്ച സൈദ്ധാന്തികൻ; പി പരമേശ്വരൻ എന്ന പ്രകാശഗോപുരം; ഇന്ന് പരമേശ്വർജി സ്മൃതി ദിനം

ഇന്ന് ഫെബ്രുവരി 9. പരമേശ്വർജി സ്മൃതി ദിനം (P Parameswaran Death Anniversary). ആര്‍എസ്എസ് സൈദ്ധാന്തികനും താത്വികാചാര്യനുമായ പി.പരമേശ്വരന്‍ എന്ന പരമേശ്വർജി ബൗദ്ധികമായ ഔന്നത്യത്തിൽ എന്നും മലയാളികളുടെ അഭിമാനമാണ്. ലാളിത്യവും ആദർശനിഷ്ഠയും നിറഞ്ഞ ജീവിതമായിരുന്നു അദ്ദേഹത്തിന്റേത്. കന്നിമാസത്തിലെ തിരുവോണനാളിൽ ചേർത്തല താലൂക്കിലെ ചാരമംഗലത്ത് താമരശേരി ഇല്ലത്ത് പരമേശ്വരൻ ഇളയതിന്റെയും സാവിത്രി അന്തർജനത്തിന്റെയും ഇളയ സന്താനമായാണു പരമേശ്വരന്റെ ജനനം. പണ്ഡിതനും കവിയുമായിരുന്ന പിതാവിന്റെ സാഹിത്യാഭിരുചി പരമേശ്വരനും ലഭിച്ചു.കായിക്കര ആർഎൽപി സ്കൂളിലാണ് ഔപചാരിക വിദ്യാഭ്യാസം ആരംഭിച്ചത്. ചേർത്തല ഇംഗ്ലിഷ് ഹൈസ്കൂളിലെ പഠനത്തിനു ശേഷം ചങ്ങനാശേരി എസ്ബി കോളജിൽനിന്ന് ഫെലോ ഓഫ് ആർട്സ് യോഗ്യതയും തിരുവനന്തപുരം യൂണിവേഴ്സിറ്റി കോളജിൽനിന്ന് ഒന്നാം റാങ്കോടെ ചരിത്രം ഐച്ഛിക വിഷയമായി ബിഎ ഓണേഴ്സും പാസായി.

എസ്ബി കോളജിൽ പഠിക്കവേ, യങ്മെൻ അസോസിയേഷൻ എന്നൊരു സംഘടന അദ്ദേഹത്തിന്റെ നേതൃത്വത്തിൽ രൂപീകരിച്ചിരുന്നു. ചെറുപ്പത്തിൽതന്നെ ആത്മീയകാര്യങ്ങളിൽ തൽപരനായിരുന്ന പരമേശ്വരൻ പത്താംക്ലാസ് പരീക്ഷ കഴിഞ്ഞ് സ്വാമി ആഗമാനന്ദയോടൊത്ത് ഭാരതതീർഥാടനം നടത്തി. യാത്രയ്ക്കിടെ കൊൽക്കത്ത ബേലൂർമഠം സന്ദർശിച്ച അദ്ദേഹം രാമകൃഷ്ണ മിഷനിൽനിന്ന് ദീക്ഷ സ്വീകരിച്ചു. തമിഴ്നാട്ടിലെ ആറ്റൂരിൽ നടന്ന ആർഎസ്എസ് സമ്മേളനത്തിനിടെ സംഘടനാ തലവൻ ഗുരുജി എന്ന എം.എസ്.ഗോൾവാൾക്കറുമായി നേരിട്ട് ഇടപഴകുവാൻ അവസരമുണ്ടായതാണു പി.പരമേശ്വരന്റെ രാഷ്ട്രീയ, സാമൂഹിക കാഴ്ചപ്പാടുകളിൽ നിർണായകമായത്.

ഗോൾവാൾക്കറുമായും ഉത്തരേന്ത്യക്കാരായ ആർഎസ്എസ് പ്രമുഖരുമായും അദ്ദേഹം അടുത്ത ബന്ധം പുലർത്തി. മുഴുവൻസമയ ആർഎസ്എസ് പ്രവർത്തകനായി മാറിയ അദ്ദേഹം തിരുവനന്തപുരത്തും പിന്നീട് കൊല്ലത്തും ചങ്ങനാശേരിയിലും കോഴിക്കോട്ടും സജീവമായി സംഘടനാപ്രവർത്തനം നടത്തി. കോഴിക്കോട് ആയിരിക്കെ കേസരി വാരികയിൽ പലവട്ടം അദ്ദേഹത്തിന്റെ ലേഖനങ്ങളും കവിതകളും പ്രസിദ്ധീകരിക്കപ്പെട്ടു. സംഘർഷത്തിലൂടെയല്ല സമന്വയത്തിലൂടെയാണു പുതിയ ലോകം സൃഷ്ടിക്കപ്പെടേണ്ടത് എന്നു വാദിച്ച ദീനദയാൽ ഉപാധ്യായയുടെ ആദർശങ്ങൾ പരമേശ്വരനെ വളരെ സ്വാധീനിച്ചു. ജനസംഘത്തിന്റെ കേരളത്തിലെ സംഘടനാകാര്യദർശിയായിരുന്ന പരമേശ്വരൻ ജനസംഘം സംസ്ഥാന സെക്രട്ടറി, ദേശീയ സെക്രട്ടറി, ദേശീയ ഉപാധ്യക്ഷൻ തുടങ്ങിയ തലങ്ങളിലേക്ക് ഉയർന്നു. അടിയന്താരവസ്ഥക്കാലത്ത് മിസ തടവുകാരനായി 16 മാസം ജയിൽശിക്ഷ അനുഭവിച്ചു.

ജനസംഘം ലയിച്ച് ജനതാപാർട്ടി രൂപംകൊണ്ടതോടെ കക്ഷിരാഷ്ട്രീയത്തിൽനിന്ന് അകന്ന അദ്ദേഹം ഡൽഹിയിലെ ദീനദയാൽ ഗവേഷണ കേന്ദ്രത്തിന്റെ ചുമതലക്കാരനാകാനാണു താൽപര്യം പ്രകടിപ്പിച്ചത്.
1982ൽ കേരളത്തിൽ തിരിച്ചെത്തിയ അദ്ദേഹം തിരുവനന്തപുരത്ത് ഭാരതീയവിചാരകേന്ദ്രം സ്ഥാപിച്ചു. മതത്തിന്റെയും രാഷ്ട്രീയത്തിന്റെയും പരിധികൾ മറികടന്ന് രാജ്യത്തും വിദേശത്തുമുള്ള പ്രഗദ്‌ഭരായ ചിന്തകരെ പങ്കെടുപ്പിച്ചുകൊണ്ട് നിരന്തരം ചർച്ചകളും സെമിനാറുകളും നടത്തി.

കന്യാകുമാരിയിലെ വിവേകാനന്ദ കേന്ദ്രത്തിന്റെയും അധ്യക്ഷനായിരുന്നു. വിവേകാനന്ദ കേന്ദ്രത്തിന്റെ പ്രസിദ്ധീകരണമായ യുവഭാരതിൽ അദ്ദേഹം എഴുതിയ മുഖപ്രസംഗങ്ങളുടെ സമാഹാരമായി ഹിന്ദുരാഷ്ട്രത്തിന്റെ ഹൃദയത്തുടിപ്പുകൾ എന്ന പുസ്തകം പ്രസിദ്ധീകരിച്ചു. ശ്രീനാരായണഗുരുവിനെക്കുറിച്ച് നവോഥാനത്തിന്റെ പ്രവാചകൻ എന്ന പേരിലും മഹർഷി അരവിന്ദനെക്കുറിച്ച് ശ്രീഅരവിന്ദൻ ഭാവിയുടെ ദാർശനികൻ എന്ന പേരിലും പുസ്തകങ്ങൾ എഴുതി.

ഇന്ത്യൻ സാഹചര്യത്തിൽ കമ്യൂണിസ്റ്റ് ആശയങ്ങളെ വിമർശനാത്മകമായി വിലയിരുത്തുന്ന മാർക്സും വിവേകാനന്ദനും, മാർക്സിൽനിന്ന് മഹർഷിയിലേക്ക്, ഗ്ലാസ്നോസ്റ്റും പെരിസ്ട്രോയിക്കയും ഇന്ത്യൻ കമ്യൂണിസ്റ്റുകളും, ഹിന്ദുധർമവും ഇന്ത്യൻ കമ്യൂണിസവും എന്നീ പുസ്തകങ്ങൾ ഏറെ പ്രശസ്തമാണ്. കേരളം ഭ്രാന്താലയത്തിൽനിന്ന് തീർഥാലയത്തിലേക്ക്, ഹാർട്ബീറ്റ് ഓഫ് ഹിന്ദു നേഷൻ, സ്വതന്ത്രഭാരതം ഗതിയും നിയതിയും, ദിശാബോധത്തിന്റെ ദർശനം തുടങ്ങിയവയും അദ്ദേഹത്തിന്റെ പുസ്തകങ്ങളാണ്. സംഘ പരിവാര്‍ പ്രസ്ഥാനങ്ങളുടെ കേരളത്തിലെ ബൗദ്ധിക മുഖമെന്ന നിലയില്‍ കഴിഞ്ഞ ആറു പതിറ്റാണ്ടുകളായി കേരളത്തിലെ സാംസ്‌കാരിക മണ്ഡലത്തിലെ സജീവ സാന്നിദ്ധ്യമായിരുന്നു അദ്ദേഹം. ഭാരതീയ ദര്‍ശനങ്ങളില്‍ പഠനങ്ങൾ നടത്തിയതോടൊപ്പം കമ്മ്യൂണിസം പോലുള്ള വൈദേശിക പ്രത്യയ ശാസ്ത്രങ്ങളെ കുറിച്ചും ഗഹനായ പാണ്ഡിത്യം അദ്ദേഹത്തിന് ഉണ്ടായിരുന്നു. 2020 ഫെബ്രുവരി 9 നാണ് പരമേശ്വർജി എന്ന ആ പ്രകാശഗോപുരം ഈ ലോകത്തോട് വിടപറഞ്ഞത്.