ചെന്നൈ അന്താരാഷ്ട്ര വിമാനത്താവളത്തിൽ നക്ഷത്ര ആമകളുമായി യാത്രക്കാരൻ പിടിയിൽ ! കാർട്ടൂൺ ബോക്സിൽ ഒളിപ്പിച്ച് കടത്താൻ ശ്രമിച്ചത് 138 നക്ഷത്ര ആമകളെ

മലേഷ്യയിലെ ക്വലാലമ്പൂരിലേക്ക് പോകാനായി എത്തിയ യാത്രക്കാരന്റെ ബാഗിൽ നിന്ന് 138 നക്ഷത്ര ആമകളെ പിടികൂടി. ചെന്നൈ അന്താരാഷ്ട്ര വിമാനത്താവളത്തിലാണ് സംഭവം. കാർട്ടൂൺ ബോക്സിനുള്ളിൽ ഒളിപ്പിച്ച് കടത്താനായിരുന്നു ശ്രമം. പിടിയിലായ വ്യക്തി ഇന്ത്യൻ പൗരൻ തന്നെയാണെന്ന് ചെന്നൈ കസ്റ്റംസ് അധികൃതർ അറിയിച്ചിട്ടുണ്ട്. എന്നാൽ ഇയാളുടെ പേര് വിവരങ്ങൾ പുറത്ത് വന്നിട്ടില്ല.

ക്വലാലമ്പൂരിലേക്കുള്ള വിമാനത്തിൽ കയറാനെത്തിയതായിരുന്നു യാത്രക്കാരൻ. യാത്ര പുറപ്പെടുന്നതിന് മുമ്പ് പരിശോധനകൾക്കിടെ ഇയാളെ സംശയം തോന്നിയതോടെയാണ് കസ്റ്റംസ് അധികൃതർ തടഞ്ഞുവെച്ച് വിശദമായ പരിശോധന നടത്തിയത്. കാർട്ടൂൺ ബോക്സ് തുറന്നപ്പോൾ ഭദ്രമായി പായ്ക്ക് ചെയ്ത നിലയിൽ 138 നക്ഷത്ര ആമകളെ കണ്ടെത്തിയത്. വൈൽഡ് ലൈഫ് കൺട്രോൾ ബ്യൂറോ ഉദ്യോഗസ്ഥർ സ്ഥലത്തെത്തി ആമകളെ ഗിണ്ടി നാഷണൽ പാർക്കിലേക്ക് മാറ്റിയിട്ടുണ്ട്.

കഴി‌ഞ്ഞ വ‍ർഷം 369 ആമകളെയുമായി എത്തിയ ഒരു യാത്രക്കാരനും 20222ൽ 171 നക്ഷത്ര ആമകളുമായി മറ്റൊരു യാത്രക്കാരനും ചെന്നൈ വിമാനത്താവളത്തിൽ പിടിയിലായിരുന്നു.