നിരന്തര പീഡനവും ലൈംഗിക അതിക്രമവും; 20 കാരനെ കൊന്ന് പകതീർത്ത് വിധവ

ന്യൂഡൽഹി : വിധവയായ ശേഷം തന്നെ തുടർച്ചയായി ലൈംഗികമായി പീഡിപ്പിക്കുകയും ഉപദ്രവിക്കുകയും ചെയ്ത 20കാരനെ സുഹൃത്തിന്റെ സഹായത്തോടെ യുവതി കൊലപ്പെടുത്തി. ദില്ലിയിൽ ശാസ്ത്രിപാർക്ക് ഭാഗത്ത് ഇന്നലെയായിരുന്നു സംഭവം. ഉത്തർപ്രദേശ് സ്വദേശിയായ ഇരുപതുകാരി, ഇവരുടെ സുഹൃത്ത് എന്നിവരെ പോലീസ് പിടികൂടി

ബെലാ ഫാമിനു സമീപം കഴുത്തിലും ശരീരത്തിലും നിരവധി മുറിവുകളുമായി ഇന്നലെ രാവിലെയാണ് മൃതദേഹം കണ്ടെത്തിയത്. തുടർന്ന് സമീപത്തെ സിസിടിവി ദൃശ്യങ്ങൾ കേന്ദ്രീകരിച്ച് പോലീസ് നടത്തിയ അന്വേഷണമാണ് പ്രതികളിലെത്തിച്ചത്. യുവതിയുടെ ഭർത്താവ് കഴിഞ്ഞ ജനുവരിയിൽ‌ മരിച്ചിരുന്നു. ഇതിനുശേഷം നിരവധി തവണയായി യുവാവ് ഇവരെ പീഡിപ്പിച്ചു, ക്രൂരമായുള്ള ലൈംഗികാതിക്രമവും തുടർന്നു. ഒടുവിൽ ഇതിൽ സഹികെട്ട് സ്വാതന്ത്ര്യം തേടി പക വീട്ടാനാണ് കൊല നടത്തിയതെന്ന് സ്ത്രീ സമ്മതിച്ചതായി പോലീസ് വ്യക്തമാക്കി.

മുൻകൂട്ടി തയ്യാറാക്കിയ പദ്ധതി പ്രകാരം ബെലാ ഫാമിനു സമീപം യമുന കരകവിഞ്ഞൊഴുകുന്നതു കാണാമെന്നു പറഞ്ഞ് യുവാവിനെ ഇവിടെ എത്തിക്കുകയും തുടർന്ന് സുഹൃത്തിന്റെ സഹായത്തോടെ കുത്തിക്കൊന്നശേഷം മൃതദേഹം ഫാമിനു സമീപം ഉപേക്ഷിക്കുകയുമായിരുന്നു.