‘പ്രധാനമന്ത്രി ‘ചന്ദ്രയാൻ’ വിക്ഷേപിച്ചു, സോണിയ ‘രാഹുൽയാൻ’ വിക്ഷേപിക്കാൻ ശ്രമിക്കുന്നു’; മക്കളെ മുഖ്യമന്ത്രിയും പ്രധാനമന്ത്രിയും ആക്കണമെന്നാണ് കോൺ​ഗ്രസ് നേതാക്കളുടെ ആ​ഗ്ര​ഹം; ആഞ്ഞടിച്ച്അമിത് ഷാ

മുംബൈ: കോൺ​ഗ്രസിനെതിരെ ആഞ്ഞടിച്ച് കേന്ദ്ര ആഭ്യന്തരമന്ത്രി അമിത് ഷാ. കഴിഞ്ഞ പത്ത് വർഷത്തിനിടെ നരേന്ദ്രമോദി സർക്കാരിന് ‘ചന്ദ്രയാൻ’ വിക്ഷേപിക്കാൻ സാധിച്ചു. എന്നാൽ ഇപ്പോൾ സോണിയ ​ഗാന്ധി ‘രാഹുൽയാൻ’ വിക്ഷേപിക്കാൻ ശ്രമിക്കുകയാണെന്ന് അമിത് ഷാ പരിഹസിച്ചു. തങ്ങളുടെ മക്കളെ മുഖ്യമന്ത്രിയും പ്രധാനമന്ത്രിയും ആക്കണമെന്നാണ് കോൺ​ഗ്രസ് നേതാക്കളുടെ
ആ​ഗ്ര​ഹമെന്നും അദ്ദേഹം പറഞ്ഞു. മഹാരാഷ്‌ട്രയിലെ ജൽഗാവിൽ നടന്ന പൊതുസമ്മേളനത്തിൽ സംസാരിക്കുകയായിരുന്നു കേന്ദ്രമന്ത്രി.

‌‌‘തങ്ങളുടെ മക്കളെ മുഖ്യമന്ത്രിയും പ്രധാനമന്ത്രിയും ആക്കണമെന്നാണ് കോൺ​ഗ്രസ് നേതാക്കളുടെ ആ​ഗ്ര​ഹം. രാഹുൽ പ്രധാനമന്ത്രിയാകണമെന്ന് സോണിയ ആ​ഗ്രഹിക്കുന്നു. അതുപോലെ, തന്റെ മകനെ മുഖ്യമന്ത്രിയാക്കാനുള്ള പദ്ധതിയിലാണ് ഉദ്ധവ്. ശരത് പവാറിനും തന്റെ മകൾ മുഖ്യമന്ത്രിയാകണം എന്നതാണ് ആലോചന. ഉദയനിധിയെ മുഖ്യമന്ത്രിയാക്കാനുള്ള ചിന്തയിലാണ് എംകെ സ്റ്റാലിൻ. വികസിത ഭാരതം കെട്ടിപ്പെടുക്കുന്നതിന് വേണ്ടി ബിജെപിക്ക് വോട്ട് ചെയ്യണം. യുവാക്കളുടെ മികച്ച ഭാവിക്ക് വേണ്ടി വോട്ട് ചെയ്യുക’എന്ന് അമിത് ഷാ പറഞ്ഞു.