സംസ്ഥാനത്ത് വൈദ്യുതി നിയന്ത്രണം; പീക്ക് സമയങ്ങളിൽ അരമണിക്കൂർ ലോഡ് ഷെഡ്ഡിങ്ങ്

തിരുവനന്തപുരം: സംസ്ഥാനത്ത് വർദ്ധിച്ചുവരുന്ന വൈദ്യുതി പ്രതിസന്ധി പരിഹരിക്കുന്നതിനായി ലോഡ് ഷെഡ്ഡിങ്ങ് ഏർപ്പെടുത്താൻ തീരുമാനമായി. തിരുവനന്തപുരത്ത് ചേർന്ന കെഎസ്ഇബി ഉന്നതതല യോഗത്തിലാണ് ഈ തീരുമാനം. വൈകിട്ട് 6 മണി മുതൽ രാത്രി 12 മണി വരെയുള്ള സമയത്തിനുള്ളിൽ അരമണിക്കൂർ വരെയായിരിക്കും വൈദ്യുതി നിയന്ത്രണം നടപ്പിലാക്കുക. വൈദ്യുതി ഉപഭോഗം പാരമ്യത്തിലെത്തുന്ന (പീക്ക്) സമയങ്ങളിൽ വാഹന ചാർജ്ജിംഗ് ഒഴിവാക്കാനും, എസിയുടെ താപനില 24 ഡിഗ്രി സെൽഷ്യസിനും 26 ഡിഗ്രി സെൽഷ്യസിനും ഇടയിൽ ക്രമീകരിക്കാനും ജനങ്ങൾക്ക് നിർദ്ദേശം നൽകിയിട്ടുണ്ട്.

വൈദ്യുതി ആവശ്യകതയിലുണ്ടായ അപ്രതീക്ഷിതമായ വർദ്ധനയാണ് നിലവിലെ പ്രതിസന്ധിക്ക് പ്രധാന കാരണമെന്ന് യോഗം വിലയിരുത്തി. സംസ്ഥാനത്തെ വൈദ്യുതി ആവശ്യകതയുടെ വളർച്ചാ നിരക്ക് പരിശോധിച്ചാൽ, ഓരോ വർഷവും ഉണ്ടാകുന്ന ശരാശരി വർദ്ധനയേക്കാൾ വളരെക്കൂടുതലാണ് ഇക്കൊല്ലം ഉണ്ടായിരിക്കുന്നത്. പശ്ചിമേഷ്യൻ യുദ്ധത്തിന്റെ പശ്ചാത്തലത്തിലുണ്ടായ പാചകവാതക ക്ഷാമം മൂലം ജനങ്ങൾ ഇൻഡക്ഷൻ പാചകത്തെ അധികമായി ആശ്രയിച്ചതും, വൈകിട്ട് 6 മണിക്കുശേഷമുള്ള ഇലക്ട്രിക് വാഹനങ്ങളുടെ ചാർജിംഗും എസിയുടെ അമിത ഉപയോഗവും ആവശ്യകത കുത്തനെ കൂടാൻ കാരണമായതായി കെഎസ്ഇബി ഉന്നതതലയോഗം വിലയിരുത്തി.

അതേസമയം, ശബരിമല യുവതി പ്രവേശനക്കേസിൽ വാദത്തിനിടെ അഭിഭാഷകന് സുപ്രീം കോടതിയിൽ നിന്ന് താക്കീത് ലഭിച്ചു. കോടതി നിശ്ചയിച്ച വിഷയങ്ങൾക്ക് അപ്പുറം പോകരുതെന്നും, നിശ്ചയിച്ചിട്ടുള്ള ഏഴ് ചോദ്യങ്ങളിൽ ഊന്നി നിന്ന് വേണം വാദിക്കാനെന്നും കോടതി കർശന നിർദ്ദേശം നൽകി. ബിജെപി നേതാവായ അഭിഭാഷകൻ അശ്വനികുമാർ ഉപാധ്യയ, “കഴിഞ്ഞ 200 കൊല്ലത്തിനിടെ ഇന്ത്യ 7 രാജ്യങ്ങളായി വിഭജിക്കപ്പെട്ടു” എന്ന വാദം ഉന്നയിച്ചപ്പോഴാണ് കോടതി ഇടപെട്ട് താക്കീത് നൽകിയത്.