പ്രവീൺ നെട്ടാരു വധക്കേസ്! മൂന്ന് വർഷമായി ഒളിവിൽ കഴിഞ്ഞിരുന്ന മുഖ്യപ്രതി കൊച്ചിയിൽ എൻഐഎ വലയിലായി

കൊച്ചി: കർണാടക ബെല്ലാരിയിലെ യുവമോർച്ച നേതാവ് പ്രവീൺ നെട്ടാരു വധക്കേസിലെ മുഖ്യപ്രതിയെ കൊച്ചി പള്ളുരുത്തിയിൽ നിന്ന് അറസ്റ്റ് ചെയ്ത് ദേശീയ അന്വേഷണ ഏജൻസി. കുടക് സ്വദേശിയായ അബ്ദുൾ നാസറാണ് പിടിയിലായത്. കഴിഞ്ഞ മൂന്ന് വർഷത്തോളമായി ഒളിവിൽ കഴിഞ്ഞിരുന്ന ഇയാളെ ബെംഗളൂരുവിലെയും കൊച്ചിയിലെയും എൻഐഎ ഉദ്യോഗസ്ഥർ ചേർന്ന് നടത്തിയ രഹസ്യ ഓപ്പറേഷനിലൂടെയാണ് പിടികൂടിയത്. പ്രതിയെക്കുറിച്ച് വിവരം നൽകുന്നവർക്ക് എൻഐഎ രണ്ട് ലക്ഷം രൂപ പാരിതോഷികം പ്രഖ്യാപിച്ചിരുന്നു. അറസ്റ്റ് ചെയ്ത അബ്ദുൾ നാസറിനെ കൂടുതൽ ചോദ്യം ചെയ്യലിനായി ബെംഗളൂരുവിലേക്ക് കൊണ്ടുപോയി.കൊലപാതകത്തിന് ശേഷം ഒളിവിൽ പോയ അബ്ദുൾ നാസറിനെ കണ്ടെത്താൻ വിവിധ സംസ്ഥാനങ്ങളിൽ എൻഐഎ വ്യാപക തിരച്ചിൽ നടത്തിവരികയായിരുന്നു. ഒടുവിൽ കൊച്ചി പള്ളുരുത്തിയിൽ രഹസ്യമായി താമസിച്ചുവരുന്നതിനിടെയാണ് എൻഐഎ സംയുക്ത സംഘത്തിന്റെ പിടിയിലാകുന്നത്.

രാജ്യവ്യാപകമായി വൻ പ്രതിഷേധത്തിന് ഇടയാക്കിയ കൊലപാതകം 2022 ജൂലൈ 26-നാണ് ദക്ഷിണ കന്നഡയിലെ ബെല്ലാരെയിൽ നടക്കുന്നത്. യുവമോർച്ച ജില്ലാ പ്രവർത്തക സമിതി അംഗവും വ്യാപാരിയുമായിരുന്ന പ്രവീൺ നെട്ടാരു രാത്രി കട അടച്ച് വീട്ടിലേക്ക് മടങ്ങുന്നതിനിടെയാണ് ബൈക്കിലെത്തിയ അക്രമിസംഘം മാരകായുധങ്ങളുമായി വെട്ടിക്കൊലപ്പെടുത്തിയത്. ഗുരുതരമായി പരിക്കേറ്റ പ്രവീണിനെ ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായിരുന്നില്ല. സംഭവം വൻ രാഷ്ട്രീയ-സാമൂഹിക പ്രതിഷേധങ്ങൾക്ക് കാരണമായതോടെയാണ് കർണാടക സർക്കാർ കേസ് അന്വേഷണം ദേശീയ അന്വേഷണ ഏജൻസിക്ക് കൈമാറിയത്.

തുടർന്ന് നടത്തിയ അന്വേഷണത്തിൽ നിരോധിത സംഘടനയായ പോപ്പുലർ ഫ്രണ്ട് ഓഫ് ഇന്ത്യയുടെയും (പിഎഫ്ഐ) അതിന്റെ രാഷ്ട്രീയ മുഖമായ എസ്ഡിപിഐയുടെയും പ്രവർത്തകരാണ് കൊലപാതകത്തിന് പിന്നിലെന്ന് എൻഐഎ കണ്ടെത്തുകയായിരുന്നു. കേസിൽ ഗൂഢാലോചന, ആയുധ ശേഖരണം, പ്രതികൾക്ക് അഭയം നൽകൽ, സാമ്പത്തിക സഹായം എത്തിക്കൽ എന്നിവയുമായി ബന്ധപ്പെട്ട് നിരവധി പേരെ ഇതിനോടകം പ്രതിചേർക്കുകയും എൻഐഎ അറസ്റ്റ് ചെയ്യുകയും ചെയ്തിട്ടുണ്ട്.