ദില്ലി : ഇറാൻ തെരഞ്ഞെടുപ്പിൽ വിജയിച്ച മസൂദ് പെസെഷ്കിയാനെ അഭിനന്ദിച്ച് പ്രധാനമന്ത്രി നരേന്ദ്ര മോദി. ഇറാനുമായുള്ള ഉഭയകക്ഷി ബന്ധം കൂടുതൽ ശക്തിപ്പെടുത്തുന്നതിനും മസൂദ് പെസെഷ്കിയാനുമായി അടുത്ത് പ്രവർത്തിക്കാനും ആഗ്രഹിക്കുന്നെന്ന് പ്രധാനമന്ത്രി പറഞ്ഞു. എക്സിലൂടെയാണ് നരേന്ദ്ര മോദി അഭിനന്ദനം അറിയിച്ചത്.
‘ഇറാൻ ഇസ്ലാമിക് റിപ്പബ്ലിക്കിന്റെ പ്രസിഡന്റായി തെരഞ്ഞെടുക്കപ്പെട്ട മസൂദ് പെസെഷ്കിയാന് അഭിനന്ദനങ്ങൾ. ജനങ്ങളുടെ നന്മയ്ക്കായി ഊഷ്മളവും സുസ്ഥിരവുമായ ഉഭയകക്ഷി ബന്ധം കൂടുതൽ ശക്തിപ്പെടുത്തുവാനും നിങ്ങളുമായി അടുത്ത് പ്രവർത്തിക്കുവാനും ആഗ്രഹിക്കുന്നു.’- പ്രധാനമന്ത്രി കുറിച്ചു.
പാര്ലമെന്റംഗവും പരിഷ്കരണവാദിയുമായ ഡോ. മസൂദ് പെസെഷ്കിയാൻ 16.3 ദശലക്ഷം വോട്ട് നേടിയാണ് വിജയിച്ചത്. ഇറാന്റെ മുൻ പ്രസിഡന്റായിരുന്ന ഇബ്രാഹിം റെയ്സി ഇക്കഴിഞ്ഞ മേയ് 19-നുണ്ടായ ഹെലികോപ്ടർ അപകടത്തിൽ മരിച്ചിരുന്നു. ഇതോടെയാണ് രാജ്യത്ത് ഇടക്കാല തെരഞ്ഞെടുപ്പ് നടന്നത്.
