2300 കോടിയുടെ പാക്കേജ് പ്രഖ്യാപിച്ച് പാക് പ്രധാനമന്ത്രി; തൃപ്തരാകാതെ പ്രക്ഷോഭകർ: ഇന്ത്യയ്‌ക്കൊപ്പം ചേരണമെന്ന ആവശ്യം ഉന്നയിച്ച് പാക് അധീന കശ്മീരിൽ പ്രക്ഷോഭം അഞ്ചാം ദിവസത്തിലേക്ക്

മുസാഫറാബാദ്: പാക് അധീന കശ്മീരിൽ പ്രക്ഷോഭകരും സുരക്ഷാ സേനയും തമ്മിലുള്ള സംഘർഷം മാറ്റമില്ലാതെ തുടരുന്നു. അതേസമയം പ്രദേശത്തിന്റെ വികസനത്തിനായി 2300 കോടിയുടെ പ്രത്യേക പാക്കേജ് പ്രധാനമന്ത്രി ഷഹബാസ് ഷെരീഫ് പ്രഖ്യാപിച്ചിരുന്നു. ഭക്ഷ്യ ധാന്യങ്ങളുടെയും, വൈദ്യുതിയുടെയും വിലവർദ്ധനയിലും അന്യായമായ നികുതിയിലും പ്രതിഷേധിച്ചാണ് അവാമി ആക്ഷൻ കമ്മിറ്റിയുടെ നേതൃത്വത്തിൽ പ്രക്ഷോഭം നടക്കുന്നത്. പ്രദേശത്ത് ജീവിക്കാൻ കഴിയാത്ത സാഹചര്യമുണ്ടെന്നും ഭരണകൂടത്തിന് പ്രദേശ വാസികളോട് ചിറ്റമ്മ നയമാണെന്നും ഭാരതത്തോട് ചേരാൻ ജനങ്ങളെ അനുവദിക്കണമെന്നും ആവശ്യപ്പെട്ടാണ് പ്രക്ഷോഭം. പ്രക്ഷോഭത്തിനിടയിൽ ജനങ്ങൾ ഇന്ത്യൻ പതാക ഉയർത്തിയതായും റിപ്പോർട്ടുകളുണ്ട്.

മെയ് 10 നാണ് പ്രക്ഷോഭം അവാമി ആക്ഷൻ കമ്മിറ്റിയുടെ നേതൃത്വത്തിൽ ആരംഭിച്ചത്. ലാത്തിച്ചാർജ്ജും കണ്ണീർവാതകവും ഉപയോഗിച്ച് സമരം അടിച്ചമർത്താൻ സർക്കാർ ശ്രമിച്ചെങ്കിലും ഫലിച്ചില്ല. മുസഫറാബാദ്, ഷെഹൻസ, മിർപുർ, റാവൽകോട്ട് തുടങ്ങിയ സ്ഥലങ്ങളിലെല്ലാം റാലികൾ നടന്നിരുന്നു. സമരം അടിച്ചമർത്തിക്കുന്നതിന്റെ ഭാഗമായി പ്രദേശത്ത് 144 പ്രഖ്യാപിക്കുകയും സ്കൂളികളും കോളേജുകളും അടച്ചിടുകയും ചെയ്തു. നിയന്ത്രണ രേഖയിൽ പാക് റെയ്ഞ്ചേഴ്‌സിന്റെ സാന്നിധ്യം വകവയ്ക്കാതെ തന്നെ സമരം തുടരുകയാണ്.

പാക് അധീന കശ്മീരിൽ ജനജീവിതം ദുസ്സഹമാണെന്നും ജനങ്ങൾക്ക് ജമ്മു കശ്മീരിലെ ജനങ്ങളുടെ ജീവിത നിലവാരവുമായി താരതമ്യം സാധ്യമാണെന്നും പ്രതിഷേധത്തിന് ഇതാണ് കാരണമെന്ന് ഇന്ത്യൻ വിദേശകാര്യ മന്ത്രി ഡോ എസ് ജയശങ്കർ ആംഭിപ്രായപ്പെട്ടു. 2019 ഭരണഘടനാ വകുപ്പ് 370 എടുത്തുകളഞ്ഞ ശേഷം ജമ്മുകശ്മീർ വികസനത്തിന്റെ പാതയിലാണ്. പാക് അധീന കശ്മീരിലെ ജനങ്ങളും അത് ആഗ്രഹിക്കുന്നുണ്ട്. പാക് അധീന കശ്മീർ ഇന്ത്യയുടെ അവിഭാജ്യ ഘടകമാണെന്നും ജയശങ്കർ അഭിപ്രായപ്പെട്ടു.