പാകിസ്ഥാന് തലവേദനയായി വിഘടനവാദ സംഘടനകൾ; പഞ്ചാബ് പ്രവിശ്യയിൽ നിരോധനാജ്ഞ; തെഹ്രീക്-ഇ-ലബ്ബൈക് പാകിസ്ഥാനെ നിരോധിക്കാൻ നീക്കം

ലാഹോർ : പാകിസ്ഥാനിലെ പഞ്ചാബ് പ്രവിശ്യയിൽ ‘തെഹ്രീക്-ഇ-ലബ്ബൈക് പാകിസ്ഥാൻ’ (TLP) എന്ന മത-രാഷ്ട്രീയ പാർട്ടിയുടെ നേതൃത്വത്തിൽ നടന്ന അക്രമാസക്തമായ പ്രകടനങ്ങളെത്തുടർന്ന് പ്രവിശ്യയിലുടനീളം രണ്ട് ദിവസത്തേക്ക് നിരോധനാജ്ഞ ഏർപ്പെടുത്തി. കൂടാതെ, തീവ്രവാദ നിലപാടുകളുള്ള ഈ പാർട്ടിയെ നിരോധിക്കാൻ പാക് സർക്കാരിനോട് ശുപാർശ ചെയ്യാനും പഞ്ചാബ് സർക്കാർ തീരുമാനിച്ചു.

പഞ്ചാബ് ഹോം ഡിപ്പാർട്ട്‌മെൻ്റ് പുറത്തിറക്കിയ പ്രസ്താവന പ്രകാരം, ശനിയാഴ്ച വരെ നിലനിൽക്കുന്ന നിരോധനാജ്ഞ, എല്ലാ പ്രതിഷേധങ്ങൾ, യോഗങ്ങൾ, പ്രകടനങ്ങൾ, റാലികൾ, ധർണ്ണകൾ, മറ്റ് ഒത്തുചേരലുകൾ എന്നിവയ്ക്ക് പൂർണ്ണമായി വിലക്കേർപ്പെടുത്തുന്നു. ഗാസ ഐക്യദാർഢ്യ മാർച്ച് നടത്താനായി ഇസ്ലാമാബാദിലെ അമേരിക്കൻ എംബസി പരിസരത്ത് എത്താൻ ടിഎൽപി പദ്ധതിയിട്ടിരുന്നു. ഇതിനിടെ, മുരീദ്‌കെയിലെ ടിഎൽപി പ്രതിഷേധ ക്യാമ്പ് പൊളിച്ചുനീക്കാൻ തിങ്കളാഴ്ച പുലർച്ചെ പോലീസ് നടത്തിയ ഓപ്പറേഷനെത്തുടർന്ന് വ്യാപകമായ സംഘർഷവും അരാജകത്വവും അരങ്ങേറിയതിൻ്റെ പശ്ചാത്തലത്തിലാണ് ഈ നീക്കം.

നാലോ അതിലധികമോ ആളുകൾ ഒത്തുചേരുന്നത് തടയാൻ ജില്ലാ ഭരണകൂടത്തിന് അധികാരം നൽകുന്ന ക്രിമിനൽ നടപടിച്ചട്ടം 144-ാം വകുപ്പ് പ്രകാരമുള്ള ഈ വിലക്ക്, ആയുധങ്ങൾ, ഉച്ചഭാഷിണികൾ, വിദ്വേഷജനകമായതോ വിഭാഗീയമായതോ ആയ ഉള്ളടക്കങ്ങൾ പ്രസിദ്ധീകരിക്കുന്നതോ വിതരണം ചെയ്യുന്നതോ ഉൾപ്പെടെയുള്ള കാര്യങ്ങൾക്കും കർശന നിയന്ത്രണം ഏർപ്പെടുത്തിയിട്ടുണ്ട്. ഭീകരവാദവും പൊതു ക്രമവുമായി ബന്ധപ്പെട്ട ആശങ്കകൾ പരിഗണിച്ചാണ് ഈ തീരുമാനം എടുത്തതെന്ന് ഹോം ഡിപ്പാർട്ട്‌മെൻ്റ് കൂട്ടിച്ചേർത്തു. വിവാഹങ്ങൾ, ശവസംസ്കാര ചടങ്ങുകൾ എന്നിവയ്ക്ക് നിരോധനം ബാധകമല്ല. വെള്ളിയാഴ്ച പ്രസംഗങ്ങൾക്കും ബാങ്കിനും മാത്രമേ ഉച്ചഭാഷിണികൾ ഉപയോഗിക്കാൻ പാടുള്ളൂ. പൊതുപ്രകടനങ്ങളും ധർണ്ണകളും ഭീകരർക്ക് ‘എളുപ്പമുള്ള ലക്ഷ്യങ്ങൾ’ ആകാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകി.

ഔദ്യോഗിക കണക്കുകൾ പ്രകാരം, മുരീദ്‌കെ ഓപ്പറേഷന് ശേഷം 2,716 പേരെ അറസ്റ്റ് ചെയ്തിട്ടുണ്ട്. ഇതിൽ 251 പേരെ ലാഹോർ പോലീസും 178 പേരെ ഷെയ്ഖുപുര പോലീസുമാണ് കസ്റ്റഡിയിൽ എടുത്തത്. കൂടാതെ, ഏകദേശം 2,800 പേരെ വിദേശയാത്ര ചെയ്യുന്നതിൽ നിന്ന് വിലക്കിയിട്ടുണ്ടെന്ന് ആഭ്യന്തര സഹമന്ത്രി തലാൽ ചൗധരി അറിയിച്ചു.

ടിഎൽപി നേതാക്കളെ ഭീകരവാദ നിരോധന നിയമത്തിൻ്റെ (ATA) നാലാം പട്ടികയിൽ ഉൾപ്പെടുത്തും. വിദ്വേഷ പ്രസംഗം നടത്തുന്നവരെയും നിയമം ലംഘിക്കുന്നവരെയും ഉടൻ അറസ്റ്റ് ചെയ്യുമെന്നും, പോലീസ് ഉദ്യോഗസ്ഥരെ കൊലപ്പെടുത്തിയതിനും പൊതുമുതൽ നശിപ്പിച്ചതിനും ഉത്തരവാദികളായ നേതാക്കൾക്കും പ്രവർത്തകർക്കുമെതിരായ കേസുകൾ തീവ്രവാദ വിരുദ്ധ കോടതികളിൽ വിചാരണ ചെയ്യുമെന്നും പഞ്ചാബ് സർക്കാർ വ്യക്തമാക്കി. പാർട്ടിയുടെ എല്ലാ സ്വത്തുക്കളും ആസ്തികളും പഞ്ചാബ് ഔഖാഫ് വകുപ്പിന് കൈമാറും.