കോഴിക്കോട്:പിഎസ്സി കോഴ വിവാദത്തിൽ ആരോപണവിധേയനായ സിപിഎം കോഴിക്കോട് ടൗണ് ഏരിയ കമ്മിറ്റി അംഗമായ പ്രമോദ് കോട്ടൂളിയെ സിപിഎം പുറത്താക്കി. കോട്ടൂളിയെ സിപിഎമ്മിന്റെ പ്രാഥമിക അംഗത്വത്തിൽ നിന്നാണ് പുറത്താക്കിയത്. ആരോപണത്തിൽ പ്രമോദ് കോട്ടൂളി നല്കിയ വിശദീകരണം തൃപ്തികരമല്ലെന്ന് വിലയിരുത്തിയും സംസ്ഥാന കമ്മിറ്റിയുടെ നിര്ദേശം ഉള്പ്പെടെ പരിഗണിച്ചുകൊണ്ടുമാണ് ജില്ലാ കമ്മിറ്റിയുടെ നടപടി. നിരപരാധിയാണെന്നും പരാതി കെട്ടിച്ചമച്ചതാണെന്നുമാണ് പ്രമോദ് ജില്ലാ സെക്രട്ടറിയേറ്റിന് നൽകിയ വിശദീകരണത്തിൽ വ്യക്തമാക്കിയിരുന്നത്.
ജില്ലാ കമ്മിറ്റി തീരുമാനം ഉച്ചയ്ക്കുശേഷം ചേര്ന്ന ടൗൺ ഏരിയാ കമ്മറ്റി യോഗത്തിലും റിപ്പോർട്ട് ചെയ്തു. വിഷയം കൈകാര്യം ചെയ്തതില് ജില്ലാ കമ്മിറ്റിക്ക് വീഴ്ച പറ്റിയതായും സംസ്ഥാന കമ്മിറ്റി വിലയിരുത്തിയിരുന്നു. പ്രമോദ് കോട്ടൂളിക്കെതിരായ നടപടിയിൽ തീരുമാനമെടുക്കാൻ രാവിലെ സിപിഎം കോഴിക്കോട് ജില്ലാ കമ്മറ്റി യോഗം ചേര്ന്നിരുന്നു. ജില്ലാ കമ്മറ്റി ഓഫീസിൽ ചേര്ന്ന യോഗത്തിൽ സംസ്ഥാന സെക്രട്ടറിയേറ്റ് അംഗങ്ങളായ ടിപി രാമകൃഷ്ണൻ, മുഹമ്മദ് റിയാസ് ഉള്പ്പെടെയുള്ളവര് പങ്കെടുത്തിരുന്നു.
ജില്ലാ കമ്മിറ്റിയംഗങ്ങളിൽ ഒരു വിഭാഗം നടപടിക്കെതിരാണെങ്കിലും സംസ്ഥാന നേതൃത്വം നൽകുന്ന നിർദേശങ്ങളുടെ അടിസ്ഥാനത്തിലാണ് പ്രമോദ് കോട്ടൂളിയെ പാര്ട്ടിയില് നിന്നും പുറത്താക്കാൻ തീരുമാനമെടുത്തതെന്നാണ് വിവരം.
