പുടിനും സെലന്‍സ്‌കിയും ബദ്ധവൈരികൾ ! ഇത് ഞാൻ പ്രതീക്ഷിച്ചതിലും അപ്പുറം ; യുദ്ധം അവസാനിപ്പിക്കുന്നതിൽ നിസ്സഹായനാണെന്ന് സമ്മതിച്ച് ഡൊണാൾഡ് ട്രമ്പ്

റഷ്യന്‍ പ്രസിഡന്റ് വ്ളാഡിമിർ പുടിനും യുക്രെയ്ൻ പ്രസിഡന്റ് വ്ളാഡിമിർ സെലന്‍സ്‌കിയും താന്‍ പ്രതീക്ഷിച്ചതിനേക്കാള്‍ കടുത്ത ശത്രുത്രയാണെന്ന് അമേരിക്കൻ പ്രസിഡന്റ് ഡൊണാൾഡ് ട്രമ്പ്. സങ്കീര്‍ണമാണ് ഇരു രാജ്യങ്ങളും തമ്മിലുള്ള പ്രശ്‌നമെന്നും ട്രമ്പ് വ്യക്തമാക്കി. റഷ്യ-യുക്രെയ്ൻ യുദ്ധം താന്‍ അവസാനിപ്പിക്കുമെന്നത് പ്രസിഡന്റ് തെരഞ്ഞെടുപ്പ് കാലത്ത് ട്രമ്പിന്റെ വാഗ്ദാനങ്ങളില്‍ ഒന്നായിരുന്നു. അധികാരത്തിലേറിയതിനു ശേഷവും, താനിടപെട്ട് 24 മണിക്കൂറിനുള്ളില്‍ യുദ്ധം അവസാനിപ്പിക്കുമെന്നായിരുന്നു ട്രമ്പിന്റെ പൊങ്ങച്ചം.

“ഞാന്‍ ഏഴ് യുദ്ധങ്ങള്‍ അവസാനിപ്പിച്ചിട്ടുണ്ട്. എന്നെ സംബന്ധിച്ച് റഷ്യ-യുക്രൈന്‍ യുദ്ധം അവസാനിപ്പിക്കുന്നത് നിസ്സാരമായിരിക്കുമെന്നാണ് വിചാരിച്ചത്. എന്നാല്‍ ഇത് കൂടുതല്‍ കഠിനമായി മാറിയിരിക്കുന്നു. സെലന്‍സ്‌കിയും പുടിനും തമ്മിലുള്ള വൈരം അഗാധമാണ്. പരസ്പരമുള്ള ശത്രുതമൂലം ശ്വാസംമുട്ടുന്ന സ്ഥിതിയിലാണ് അവര്‍. അതുകൊണ്ട് അവര്‍ക്ക് പരസ്പരം സംസാരിക്കാന്‍ പോലും കഴിയുന്നില്ല,”- ട്രമ്പ് മാദ്ധ്യമങ്ങളോട് പറഞ്ഞു.

നേരത്തെ പഹല്‍ഗാമിലെ ഭീകരാക്രമണത്തെ തുടര്‍ന്ന് ഉണ്ടായ ഇന്ത്യ- പാക് സംഘര്‍ഷാവസ്ഥ പരിഹരിക്കപ്പെട്ടത് തന്റെ ഇടപെടല്‍ മൂലമാണെന്നും ട്രമ്പ് അവകാശപ്പെട്ടിരുന്നു. ഇത് ഇന്ത്യ തള്ളിക്കളയുകയും ചെയ്തിരുന്നു.