‘നൂപൂർ ശർമ്മ ഒരു ഹീറോയാണ്’, ഉദയ്പൂർ അക്രമത്തിന് കാരണം ജിഹാദികളാണ്; നൂപുർ ശർമ്മയ്ക്ക് പിന്തുണയുമായി വീണ്ടും ഡച്ച് എംപി ഗീർട്ട് വൈൽഡേഴ്സ്

ദില്ലി: ബിജെപി മുൻ വക്താവ് നൂപുർ ശർമ്മയെ പിന്തുണച്ച് വീണ്ടും ഡച്ച് എംപി ഗീർട്ട് വൈൽഡേഴ്സ്. ഇന്ത്യയ്‌ക്ക് ശരിഅത്ത് കോടതികൾ ഇല്ലെന്ന് ഞാൻ കരുതിയെന്നും നൂപുർ ശർമ്മ ഒരു ഹീറോയാണെന്നും സത്യം പറഞ്ഞതിന് ഒരിക്കലും മാപ്പ് പറയരുതെന്നും ഡച്ച് എംപി ട്വിറ്ററിൽ കുറിച്ചു. ഇതിന് മുമ്പും പ്രവാചക നൂപുർ ശർമ്മയെ പിന്തുണച്ചുകൊണ്ട് ഗീർട്ട് എത്തിയിരുന്നു.

‘ഇന്ത്യയ്‌ക്ക് ശരിഅത്ത് കോടതികൾ ഇല്ലെന്ന് ഞാൻ കരുതി. മുഹമ്മദിനെ കുറിച്ച് സത്യം പറഞ്ഞതിന് നൂപുർ ശർമ്മ ഒരിക്കലും മാപ്പ് പറയരുത്. ഉദയ്പൂരിൽ നടന്ന കൊലപാതകത്തിന് അവർ ഉത്തരവാദിയല്ല. തീവ്ര ജിഹാദി മുസ്ലീങ്ങളാണ് ഇതിനെല്ലാം ഉത്തരവാദി. നൂപൂർ ശർമ്മ ഒരു ഹീറോയാണ്,’ ഐ സപ്പോർട്ട് നൂപുർ ശർമ്മ എന്ന ഹാഷ്ടാഗോടെ അദ്ദേഹം ട്വിറ്ററിൽ കുറിച്ചു.

കഴിഞ്ഞ ദിവസം പ്രവാചക നിന്ദയാരോപിച്ച് സുപ്രീം കോടതി നൂപുർ ശർമ്മയെ വിമർശിച്ചിരുന്നു. രാജ്യത്ത് നടന്ന ഇത്രയും ആക്രമണങ്ങളും ഉത്തരവാദി നൂപുർ ശർമ്മയാണെന്നും തന്റെ പരാമർശത്തിന് നൂപുർ ശർമ്മ രാജ്യത്തോട് മാപ്പ് പറയണമന്നുമാണ് കോടതി പറഞ്ഞു. ഉദയ്പൂർ കൊലപാതകത്തിന്റെ ഉത്തരവാദിത്വവും നൂപുർ ശർമ്മയ്‌ക്കാണെന്ന് കോടതി പരാമർശിച്ചിരുന്നു.