തിരുവനന്തപുരം : ലൈംഗിക പീഡനക്കേസിൽ ഒളിവിലുള്ള രാഹുല് മാങ്കൂട്ടത്തിലിനെ പാർട്ടിയിൽ നിന്ന് പുറത്താക്കി കോണ്ഗ്രസ്. കേസിൽ കോടതി മുന്കൂര് ജാമ്യഹര്ജി തള്ളിയതിന് പിന്നാലെയാണ് രാഹുല് മാങ്കൂട്ടത്തിലിനെ പാര്ട്ടിയില്നിന്ന് പുറത്താക്കിയതായി കെപിസിസി അദ്ധ്യക്ഷന് അറിയിച്ചത്.
നിലവില് സസ്പെന്ഷനിലുള്ള രാഹുല് മാങ്കൂട്ടത്തിലിനെ ഉയര്ന്ന പരാതികളുടെയും രജിസ്റ്റര് ചെയ്ത കേസുകളുടെയും അടിസ്ഥാനത്തില് കോണ്ഗ്രസിന്റെ പ്രാഥമിക അംഗത്വത്തില് നിന്നും പുറത്താക്കിയതായി കെപിസിസി പ്രസിഡന്റ് സണ്ണി ജോസഫ് എംഎല്എ അറിയിച്ചു.
യുവതി നേരിട്ട് മുഖ്യമന്ത്രിക്ക് പരാതി നല്കുകയും മൊഴി രേഖപ്പെടുത്തി പോലീസ് കേസെടുക്കുകയും ചെയ്തതോടെ രാഹുലിനെ പാര്ട്ടിയില്നിന്ന് പുറത്താക്കണമെന്ന് മുതിര്ന്ന കോണ്ഗ്രസ് നേതാക്കള് നേരത്തെ ആവശ്യമുന്നയിച്ചിരുന്നു. കെ. മുരളീധരനടക്കമുള്ള പല നേതാക്കളും കഴിഞ്ഞദിവസങ്ങളില് രാഹുലിനെതിരെ വിമര്ശനവുമായി രംഗത്തെത്തിയിരുന്നു. തദ്ദേശ തെരഞ്ഞെടുപ്പ് പടിവാതിൽക്കൽ എത്തി നിൽക്കെ രാഹുല് വിഷയം കോണ്ഗ്രസിനെയും പ്രതിസന്ധിയിലാക്കി. ഇതോടെയാണ് രാഹുല് മാങ്കൂട്ടത്തിലിനെ പുറത്താക്കാമെന്ന തീരുമാനത്തിലെത്തിയത്.
