എറ്റവും മികച്ച അഭിനേത്രി; കങ്കണയെ ഇഷ്ടപ്പെടുന്നതിനുള്ള കാരണങ്ങൾ അഭിമുഖത്തില്‍ തുറന്നു പറഞ്ഞ് രമ്യ കൃഷ്ണ

നടിയും സംവിധായകയുമായ കങ്കണ റണാവത്തിനെ പുകഴ്‌ത്തി നടി രമ്യ കൃഷ്ണ. രാജ്യത്തെ യുവ താരങ്ങൾക്കിടയിലെ ഏറ്റവും മികച്ച അഭിനേത്രിയാണ് കങ്കണയെന്ന് രമ്യ കൃഷ്ണ പറഞ്ഞു. താൻ കങ്കണയെ ഏറെ ഇഷ്ടപ്പെടുന്നുവെന്നും ധൈര്യവും സത്യസന്ധതയുമുള്ള വ്യക്തിത്വത്തിന് ഉടമയാണ് കങ്കണയെന്നും നടി തുറന്നു പറഞ്ഞിരിക്കുകയാണ്.

മികച്ച കഥാപാത്രങ്ങളെ മികവുറ്റ രീതിയിൽ പ്രേക്ഷകരിലെത്തിക്കാൻ സാധിക്കുന്ന നടിയാണ് കങ്കണയെന്നും ഒരു സ്വകാര്യ ചാനലിന് നൽകിയ അഭിമുഖത്തിൽ രമ്യ കൃഷ്ണ പറഞ്ഞു. കങ്കണ റണാവത്ത് കേന്ദ്ര കഥാപാത്രമായി എത്തിയ ‘തലൈവി’ എന്ന സിനിമയും രമ്യ കൃഷ്ണന്റെ വെബ് സീരീസായ ‘ക്വീനും’ തമിഴ്‌നാട് മുഖ്യമന്ത്രി ആയിരുന്ന ജയലളിതയുടെ ജീവിത കഥയാണ് പറയുന്നത്. ജയലളിതയുടെ കഥാപാത്രത്തെയാണ് ഇരുവരും അവതരിപ്പിക്കുന്നത്.

അതേസമയം, ഇന്ത്യയുടെ പ്രഥമ വനിതാ പ്രധാനമന്ത്രി ഇന്ദിരാഗാന്ധിയായി വേഷമിടുന്ന കങ്കണയുടെ എമർജൻസി എന്ന സിനിമയുടെ ചിത്രീകരണം പുരോ​ഗമിക്കുകയാണ്. അടിയന്തരാവസ്ഥ കാലം പശ്ചാത്തലമാകുന്ന ചിത്രത്തിന്റെ കഥയും തിരക്കഥയും സംവിധാനവും നിർവ്വഹിക്കുന്നത് കങ്കണ തന്നെയാണ്. മണികർണിക ഫിലിംസിന്റെ ബാനറിൽ കങ്കണയും രേണു പിറ്റിയും ചേർന്നാണ് എമർജൻസി നിർമ്മിക്കുന്നത്. കങ്കണ തന്നെ ടൈറ്റിൽ കഥാപാത്രത്തെ അവതരിപ്പിച്ച് 2019-ൽ പുറത്തെത്തിയ ‘മണികർണിക: ദ് ക്വീൻ ഓഫ് ഝാൻസി’ ആയിരുന്നു നടി സംവിധാനം ചെയ്ത ആദ്യം ചിത്രം.