“രക്ഷാ ദൗത്യത്തില്‍ സഹകരിക്കും…ഇന്ത്യക്കാരെ സുരക്ഷിതരായി ഒഴിപ്പിക്കും”; പ്രധാനമന്ത്രിയുടെ ആവശ്യം അംഗീകരിച്ച് പുടിൻ

മോസ്‌കോ: യുക്രെയ്‌നിൽ നിന്നും ഇന്ത്യക്കാരെ സുരക്ഷിതരായി ഒഴിപ്പിക്കുന്നതിനുള്ള രക്ഷാദൗത്യത്തില്‍ സഹകരിക്കുമെന്ന് റഷ്യ(Russia). ആവശ്യമായ എല്ലാ നടപടികളും സ്വീകരിക്കാൻ റഷ്യൻ സേന ഒരുക്കമാണെന്ന് ഇന്ത്യയിലെ റഷ്യൻ എംബസി അറിയിച്ചു.യുക്രെയ്നിൽ നിന്നും മടങ്ങുന്ന ഇന്ത്യക്കാർക്ക് റഷ്യൻ സൈന്യം സുരക്ഷ ഒരുക്കുമെന്നും റഷ്യ കൂട്ടിച്ചേർത്തു. ഇന്നലെ രാത്രിയോടെ പ്രധാനമന്ത്രി നരേന്ദ്രമോദിയും റഷ്യൻ പ്രസിഡന്റ് വ്‌ളോഡിമർ പുടിനും തമ്മിലുള്ള ചർച്ചയ്‌ക്ക് ശേഷമാണ് തീരുമാനം.

ഇന്നലെ ഇന്ത്യൻ പൗരന്മാരെ അടിയന്തിരമായി മാതൃരാജ്യത്തേക്ക് തിരികെ എത്തിക്കുന്നതുമായി ബന്ധപ്പെട്ട കാര്യങ്ങൾ ചർച്ച ചെയ്യുന്നതിന് പ്രധാനമന്ത്രി നരേന്ദ്രമോദി പുടിനുമായി ടെലിഫോൺ സംഭാഷണം നടത്തിയിരുന്നു.ഒരാഴ്ചയ്‌ക്കിടെ ഇത് രണ്ടാം തവണയാണ് ഇരു നേതാക്കളും ചർച്ച നടത്തുന്നത്. റഷ്യൻ അതിർത്തി വഴിയാകും വിദ്യാർത്ഥികളെ സെന്യത്തിന്റെ സഹായത്തോടെ ഒഴിപ്പിക്കുക. ഖാർകീവിൽ റഷ്യൻ ആക്രമണം രൂക്ഷമായ സാഹചര്യത്തിലാണ് തീരുമാനം. ഇന്ത്യ മുന്നോട്ട് വച്ച നിർദേശം പോലെ റഷ്യൻ പ്രദേശത്ത് നിന്ന് സ്വന്തം സൈനിക, ഗതാഗത വിമാനങ്ങളോ ഇന്ത്യൻ വിമാനങ്ങളോ ഉപയോഗിച്ച് അവരെ നാട്ടിലേക്ക് അയക്കുമെന്നും റഷ്യ വ്യക്തമാക്കിയിട്ടുണ്ട്.

അതേസമയം ഞങ്ങള്‍ ഇന്ത്യയുമായി നയതന്ത്രപരമായ സഖ്യകക്ഷികളാണ്. യുക്രെയ്ൻ വിഷയം ഐക്യരാഷ്ട്രസഭയില്‍ എത്തിയപ്പോള്‍ ഇന്ത്യ എടുത്ത നിലപാടിന് ഞങ്ങള്‍ നന്ദിയുള്ളവരാണ്. ഇന്ത്യയിലേക്കുള്ള എസ്-400 പ്രതിരോധസംവിധാനത്തിന്റെ വിതരണത്തെ നിലവിലെ സാഹചര്യം ബാധിക്കില്ല എന്നും റഷ്യ പ്രതികരിച്ചു.