സമൻസുകൾ നിരന്തരം അവഗണിച്ചു!! പ്രതിരോധം തീർത്തിരുന്നത് ഹാജരായാൽ പുറത്ത് വെച്ച് ആക്രമണങ്ങൾ ഉണ്ടാകാൻ സാധ്യതയുണ്ടെന്ന വാദം നിരത്തി,സ്വാതന്ത്ര്യസമര സേനാനികൾ നെഞ്ചിൽ വെടിയുണ്ടയേറ്റു വാങ്ങിയപ്പോൾ മുട്ടയേറിനെ പേടിക്കുന്നത് എന്തിനെന്ന് മറുചോദ്യം, വിദ്വേഷ പ്രസംഗ കേസിൽ തൃണമൂൽ എം.പി മഹുവ മൊയ്ത്രയ്‌ക്കെതിരെ അറസ്റ്റ് വാറണ്ട്

കൊൽക്കത്ത : വിദ്വേഷ പ്രസംഗ കേസിൽ തൃണമൂൽ കോൺഗ്രസ് എം പി മഹുവ മൊയ്ത്രയ്‌ക്കെതിരെ അറസ്റ്റ് വാറണ്ട്. കോടതിയുടെ സമൻസ് തുടർച്ചയായി അവഗണിച്ചതിനെ തുടർന്നാണ് മഹുവ മൊയ്ത്രയ്‌ക്കെതിരെ പശ്ചിമ ബംഗാളിലെ കൃഷ്ണനഗർ കോടതി വാറണ്ട് ഉത്തരവ് പുറപ്പെടുവിച്ചിരിക്കുന്നത്. താൻ കൃഷ്ണനഗർ മണ്ഡലത്തിൽ നിന്നുള്ള എം.പിയാണെങ്കിലും കേസിൽ കോടതിയിൽ നേരിട്ട് ഹാജരാകാൻ കഴിയില്ലെന്ന നിലപാടാണ് മഹുവ മൊയ്ത്ര സ്വീകരിച്ചിരുന്നത്. കോടതിയിൽ ഹാജരായാൽ പുറത്ത് വെച്ച് ആക്രമണങ്ങൾ ഉണ്ടാകാൻ സാധ്യതയുണ്ടെന്ന് എം.പിയുടെ അഭിഭാഷകൻ വാദിച്ചെങ്കിലും, കോടതിയുടെ ഉത്തരവുകളോട് പ്രതിക്ക് യാതൊരു ബഹുമാനവുമില്ലെന്ന് ചൂണ്ടിക്കാട്ടിയാണ് ജഡ്ജി അറസ്റ്റ് വാറണ്ടിന് ഉത്തരവിട്ടത്. ആഗസ്റ്റ് 28നകം വാറണ്ട് നടപ്പിലാക്കിയതിന്റെ റിപ്പോർട്ട് സമർപ്പിക്കാനും കോടതി നിർദ്ദേശിച്ചിട്ടുണ്ട്.

തുളസിമാലയെക്കുറിച്ചും മതവികാരങ്ങളെക്കുറിച്ചും മഹുവ മൊയ്ത്ര നടത്തിയ പരാമർശങ്ങൾ ഇരുവിഭാഗങ്ങൾക്കുമിടയിൽ ശത്രുത വളർത്തുന്നതാണെന്നും മതവികാരം വ്രണപ്പെടുത്തുന്നതാണെന്നും ചൂണ്ടിക്കാട്ടി കൃഷ്ണനഗറിലെ ഘുർണി പ്രദേശത്തുനിന്നുള്ള ആറ് സ്ത്രീകൾ നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തിരിക്കുന്നത്. സ്ത്രീകൾക്കെതിരായ അപമാനകരമായ പരാമർശങ്ങൾ, മതവികാരം വ്രണപ്പെടുത്തൽ, വിദ്വേഷ പ്രസംഗം തുടങ്ങിയ വിവിധ വകുപ്പുകൾ പ്രകാരമാണ് ഭാരതീയ ന്യായ സംഹിത (BNS) അനുസരിച്ച് എം.പിക്കെതിരെ കേസെടുത്തിട്ടുള്ളത്. കോടതി പലതവണ ആവശ്യപ്പെട്ടിട്ടും എം.പി ഒരിക്കൽ പോലും നേരിട്ട് ഹാജരാകാൻ തയ്യാറായിരുന്നില്ല.

ഈ കേസിന് പുറമെ, മറ്റൊരു വിദ്വേഷ പ്രസംഗ കേസിൽ ആഗസ്റ്റ് 15-നകം പോലീസിന് മുമ്പിൽ ഹാജരാകണമെന്ന കൽക്കട്ട ഹൈക്കോടതി ഉത്തരവിനെതിരെ മഹുവ മൊയ്ത്ര സുപ്രീം കോടതിയെ സമീപിച്ചിരുന്നെങ്കിലും തിരിച്ചടി നേരിട്ടിരുന്നു. രാഷ്ട്രീയ പ്രവർത്തകർ എന്ന നിലയിൽ ഇത്തരം വെല്ലുവിളികളെയാണ് നേരിടേണ്ടതെന്നും, സ്വാതന്ത്ര്യസമര സേനാനികൾ നെഞ്ചിൽ വെടിയുണ്ടയേറ്റു വാങ്ങിയപ്പോൾ മുട്ടയേറിനെ പേടിക്കുന്നത് എങ്ങനെയെന്നുമായിരുന്നു സുപ്രീം കോടതിയുടെ നിരീക്ഷണം. വാറണ്ട് പുറപ്പെടുവിച്ച പശ്ചാത്തലത്തിൽ കേസിൽ കൂടുതൽ നിയമനടപടികൾ വേഗത്തിലാക്കാനാണ് പശ്ചിമബംഗാൾ പോലീസിന്റെ നീക്കം.