ഋഷഭ് പന്തിന്റെ ആരോഗ്യനിലയിൽ പുരോഗതി, അണുബാധ ഒഴിവാക്കാൻ പ്രൈവറ്റ് സ്യൂട്ടിലേക്ക് മാറ്റി; താരത്തെ കാണാൻ ആശുപത്രിയിൽ ആരാധക പ്രവാഹം

ഡെറാഡൂൺ: കാറപകടത്തിൽ പരിക്കേറ്റ് ആശുപത്രിയിൽ ചികിത്സയിൽ കഴിയുന്ന ക്രിക്കറ്റ് താരം ഋഷഭ് പന്തിനെ പ്രൈവറ്റ് സ്യൂട്ടിലേക്ക് മാറ്റി. താരത്തിന്റെ ആരോഗ്യനില തൃപ്തികരമാണെന്നും അണുബാധ ഉണ്ടാകാനിടയുള്ളതിനാലാണ് പ്രത്യേക സ്യൂട്ടിലേക്ക് മാറ്റുന്നതെന്നും ആശുപത്രി അധികൃതർ വ്യക്തമാക്കി .

താരത്തിനെ കാണാനായി ആശുപത്രിയിൽ ആയിരങ്ങളാണ് ഒഴുകിത്തയെത്തുന്നത്. സന്ദർശകരുടെ എണ്ണം ഉയരുന്നതിൽ ഡൽഹി ജില്ലാ ക്രിക്കറ്റ് അസോസിയേഷൻ ഡയറക്ടർ ശ്യാം ശർമ ആശങ്ക പ്രകടിപ്പിച്ചു. അപകടത്തിൽ പന്തിന്റെ നെറ്റിയിൽ രണ്ടിടത്ത് പരിക്കുണ്ട്. വലതുകാൽമുട്ടിലെ ലിഗമെന്റിനും പരിക്കുണ്ട്. വലത് കൈത്തണ്ട, കണങ്കാൽ, കാൽവിരൽ എന്നിവിടങ്ങളിലും സാരമായി പരിക്കേറ്റിട്ടുണ്ടെന്നാണ് വിവരം.നെറ്റിയിലെ പരിക്കിന് കഴിഞ്ഞ ദിവസം പന്തിനെ പ്ലാസ്റ്റിക് സർജറിക്ക് വിധേയനാക്കിയിരുന്നു.

അതെ സമയം താരത്തിന്റെ ചികിത്സ ചെലവുകൾ ഉത്തരാഖണ്ഡ് സർക്കാർ വഹിക്കുമെന്ന് മുഖ്യമന്ത്രി പുഷ്‌കർ സിംഗ് ധാമി അറിയിച്ചിരുന്നു. ജീവൻ പണയപ്പെടുത്തി ഋഷഭ് പന്തിനെ രക്ഷിച്ച ബസ് ഡ്രൈവറെയും കണ്ടക്ടറെയും ആദരിക്കുമെന്ന് സർക്കാർ അറിയിച്ചിട്ടുണ്ട്.