സൗഹൃദത്തിൽ ‘വിള്ളൽ’: മെലോണിക്കെതിരെ ആഞ്ഞടിച്ച് ട്രംപ്; പോപ്പിനെ ചൊല്ലി തർക്കം രൂക്ഷം!

വാഷിങ്ടൺ: ലോക രാഷ്ട്രീയത്തിലെ ഉറ്റ സഖ്യകക്ഷികളായിരുന്ന അമേരിക്കൻ പ്രസിഡന്റ് ഡൊണാൾഡ് ട്രംപും ഇറ്റാലിയൻ പ്രധാനമന്ത്രി ജോർജിയ മെലോണിയും തമ്മിലുള്ള രാഷ്ട്രീയ ബന്ധത്തിൽ വലിയ വിള്ളൽ. ഇറാനെതിരായ സൈനിക നീക്കത്തിൽ അമേരിക്കയെ സഹായിക്കാൻ മെലോണി തയ്യാറാകാത്തതാണ് ട്രംപിനെ ചൊടിപ്പിച്ചത്. മെലോണിക്ക് വലിയ ധൈര്യമുണ്ടെന്നാണ് താൻ കരുതിയതെന്നും എന്നാൽ അത് തെറ്റായിരുന്നുവെന്നും താൻ ഞെട്ടിപ്പോയെന്നും ഇറ്റാലിയൻ പത്രമായ ‘കൊറിയർ ഡെല്ല സെറ’യ്ക്ക് നൽകിയ അഭിമുഖത്തിൽ ട്രംപ് തുറന്നടിച്ചു.

ഇസ്രയേലുമായുള്ള പ്രതിരോധ സഹകരണ കരാർ പുതുക്കേണ്ടതില്ലെന്ന ഇറ്റലിയുടെ തീരുമാനമാണ് തർക്കങ്ങളുടെ തുടക്കം. മുൻപ് ട്രംപിന് സമാധാനത്തിനുള്ള നൊബേൽ സമ്മാനം നൽകണമെന്ന് ആഗ്രഹം പ്രകടിപ്പിച്ചിരുന്ന മെലോണി, ഇപ്പോൾ അമേരിക്കയുടെ വിദേശനയങ്ങളോട് കടുത്ത വിയോജിപ്പാണ് പ്രകടിപ്പിക്കുന്നത്. മെലോണി ഒരു അസ്വീകാര്യയായ നേതാവാണെന്ന ട്രംപിന്റെ പരിഹാസത്തിന്, സഖ്യകക്ഷികൾക്കിടയിൽ വിയോജിപ്പുകൾ തുറന്നു പറയുന്നതിൽ തെറ്റില്ലെന്നായിരുന്നു ഇറ്റലിയുടെ മറുപടി.

ലിയോ പതിനാലാമൻ മാർപ്പാപ്പയെ ട്രംപ് ഭീഷണിപ്പെടുത്തിയതോടെയാണ് ഇരുവരും തമ്മിലെ ബന്ധം പൂർണ്ണമായും വഷളായത്. മാർപ്പാപ്പക്കെതിരായ ട്രംപിന്റെ പ്രസ്താവന അംഗീകരിക്കാനാവില്ലെന്നും അത് അസ്വീകാര്യമാണെന്നും മെലോണി വ്യക്തമാക്കി. ലോക സമാധാനത്തിനായി നിലകൊള്ളുന്നതും യുദ്ധങ്ങളെ അപലപിക്കുന്നതും മാർപ്പാപ്പയുടെ രീതിയാണെന്നും അതിനെ ചോദ്യം ചെയ്യേണ്ടതില്ലെന്നും അവർ കൂട്ടിച്ചേർത്തു. യൂറോപ്പിലെ മിക്ക രാഷ്ട്രത്തലവന്മാരും പോപ്പിനെതിരായ ട്രംപിന്റെ നീക്കത്തെ അപലപിച്ചുകൊണ്ട് മെലോണിക്ക് പിന്തുണയുമായി രംഗത്തെത്തിയിട്ടുണ്ട്.

ഇറ്റലിക്കുള്ളിൽ മെലോണി നേരിടുന്ന ആഭ്യന്തര രാഷ്ട്രീയ വെല്ലുവിളികളും ഈ നിലപാട് മാറ്റത്തിന് കാരണമായിട്ടുണ്ടെന്നാണ് വിലയിരുത്തൽ. അടുത്തിടെ നടന്ന ഹിതപരിശോധനയിൽ സർക്കാരിന് തിരിച്ചടി നേരിട്ടിരുന്നു. ഇതിനുപുറമെ, ഇറാൻ സംഘർഷം മൂലമുള്ള ഇന്ധനവില വർദ്ധനവും സാമ്പത്തിക പ്രതിസന്ധിയും ഇറ്റാലിയൻ ജനതയ്ക്കിടയിൽ വലിയ പ്രതിഷേധത്തിന് കാരണമാകുന്നുണ്ട്. ഈ സാഹചര്യത്തിൽ ട്രംപിന്റെ തീവ്ര നിലപാടുകളിൽ നിന്ന് അകലം പാലിച്ച് സ്വന്തം പ്രതിച്ഛായ സംരക്ഷിക്കാനാണ് മെലോണി ഇപ്പോൾ ശ്രമിക്കുന്നത്.