ഈസ്റ്റർ പ്രമാണിച്ച് വെടി നിർത്തൽ പ്രഖ്യാപിച്ച് റഷ്യ ; യുക്രെയ്ന്റെ ആക്രമണം ഉണ്ടായാൽ മാത്രം തിരിച്ചടിക്കും ; പ്രതികരിക്കാതെ സെലൻസ്കി

മോസ്‌കോ : ഈസ്റ്റർ പ്രമാണിച്ച് യുക്രെയ്ൻ യുദ്ധത്തില്‍ താത്കാലിക വെടിനിര്‍ത്തല്‍ പ്രഖ്യാപിച്ച് റഷ്യന്‍ പ്രസിഡന്റ് വ്ളാഡിമിർ പുടിൻ. ഇന്ന് വൈകുന്നേരം മുതല്‍ നാളെ അര്‍ധ രാത്രിവരെയാണ് റഷ്യയുടെ വെടിനിര്‍ത്തല്‍ പ്രഖ്യാപിച്ചിരിക്കുന്നത്. റഷ്യയുടെ പ്രഖ്യാപനത്തോട് യുക്രെയ്ൻ പ്രസിഡന്റ് വ്ളാഡിമിർ സെലൻസ്കിയോ ഔദ്യോഗിക വൃത്തങ്ങളോ ഇതുവരെ പ്രതികരിച്ചിട്ടില്ല.

വെടിനിര്‍ത്തല്‍ കാലയളവിലെ യുക്രെയ്‌ന്റെ നടപടികള്‍, സമാധാനപരമായ ഒത്തുതീര്‍പ്പിനുള്ള അവരുടെ താത്പര്യം എത്രത്തോളമുണ്ടെന്ന് വ്യക്തമാക്കുമെന്നും പുടിൻ പറഞ്ഞു. എന്നാൽ യുക്രെയ്‌ൻറെ ഭാഗത്തുനിന്ന് ആക്രമണം ഉണ്ടായാൽ തിരിച്ചടി കൊടുക്കാൻ സൈന്യത്തെ സജ്ജമാക്കണമെന്നും പുടിൻ നിര്‍ദേശം നല്‍കിയിട്ടുണ്ട്.

കഴിഞ്ഞമാസം അമേരിക്കൻ പ്രസിഡന്റ് ഡൊണാള്‍ഡ് ട്രംപുമായുള്ള ഫോണ്‍ സംഭാഷണത്തിന് പിന്നാലെ യുക്രെയ്നിലെ ഊര്‍ജവിതരണ സംവിധാനങ്ങള്‍ക്കെതിരായ ആക്രമണങ്ങള്‍ 30 ദിവസത്തേക്ക് നിര്‍ത്തിവെയ്ക്കാന്‍ പുടിൻ സമ്മതിച്ചിരുന്നു.