ആക്രമണ ഭീതിയിൽ റഷ്യൻ തലസ്ഥാനവും ; മോസ്‌കോയിൽ ആക്രമണത്തിനെത്തിയ ഡ്രോണുകൾ വെടിവച്ചിട്ടു

മോസ്കോ: അതിർത്തി കടന്ന് മോസ്കോ നഗരത്തെ ലക്ഷ്യമിട്ടെത്തിയ രണ്ട് ഡ്രോണുകൾ വെടിവെച്ചിട്ടെന്ന അവകാശവാദവുമായി റഷ്യ. മോസ്‌കോ മേയർ സെർജി സോബയാനിനാണ് ഡ്രോണുകൾ വെടിവെച്ചിട്ട കാര്യം പുറത്തുവിട്ടതെന്ന് പ്രമുഖ വാർത്ത ഏജൻസി റിപ്പോർട്ട് ചെയ്തു.

നഗരത്തിനു മുകളിലൂടെ പറക്കാൻ ശ്രമിച്ച രണ്ട് ഡ്രോണുകളെ എയർ ഡിഫൻസ് സിസ്റ്റം തകർത്തുവെന്നും ഇതിൽ ഒരെണ്ണം ജനവാസ മേഖലയായ ഡോമോഡോവോ മേഖലയിലും മറ്റൊന്ന് മിൻസോക്കെ ഹൈവേയിലുമാണ് തകർന്നു വീണതെന്നും സെർജി സോബയാനിൻ വ്യക്തമാക്കി. അപകടത്തിൽ ആർക്കും പരിക്കേറ്റിട്ടില്ല. പിന്നീട് ഇക്കാര്യം റഷ്യൻ പ്രതിരോധ മ​ന്ത്രാലയവും സ്ഥിരീകരിച്ചു. ഡ്രോണുകൾ ഉപയോഗിച്ച് മോസ്കോയിൽ ആക്രമണം നടത്താനുള്ള യുക്രെയ്ൻ ശ്രമം പരാജയപ്പെടുത്തിയെന്ന് റഷ്യൻ പ്രതിരോധ മന്ത്രാലയം അറിയിച്ചു.