സഞ്ജു പുറത്ത്, ഇഷാൻ അകത്ത്; ടീം ഇന്ത്യയുടെ ഏകദിന സ്ക്വാഡ് പ്രഖ്യാപനം 19-ന്

മുംബൈ: ടി20 ലോകകപ്പിലെ ഉജ്ജ്വല പ്രകടനത്തിന് പിന്നാലെ സഞ്ജു സാംസൺ ഇന്ത്യൻ ഏകദിന ടീമിലെത്തുമെന്ന് പ്രതീക്ഷിച്ച ആരാധകർക്ക് നിരാശ. ടി20 ലോകകപ്പിലെ ടോപ് സ്കോററും ടൂർണമെന്റിലെ താരവുമായിട്ടും സഞ്ജുവിനെ അഫ്ഗാനിസ്ഥാനെതിരായ ഏകദിന പരമ്പരയിലേക്ക് പരിഗണിച്ചേക്കില്ലെന്നാണ് റിപ്പോർട്ട്. അജിത് അഗാർക്കറുടെ നേതൃത്വത്തിലുള്ള സെലക്ഷൻ കമ്മിറ്റി, സഞ്ജുവിന് പകരം ഇഷാൻ കിഷനെ വിക്കറ്റ് കീപ്പർ സ്ഥാനത്തേക്ക് തിരികെ കൊണ്ടുവരാൻ ഒരുങ്ങുന്നതായി ‘ടൈംസ് ഓഫ് ഇന്ത്യ’ റിപ്പോർട്ട് ചെയ്തു.

ഈ മാസം 19-ന് അഫ്ഗാനിസ്ഥാനെതിരായ ടെസ്റ്റ്, ഏകദിന പരമ്പരകൾക്കുള്ള ടീമിനെ പ്രഖ്യാപിക്കുമെന്നാണ് സൂചന. ഏകദേശം രണ്ട് വർഷത്തെ ഇടവേളയ്ക്ക് ശേഷമാണ് ഇഷാൻ കിഷൻ ഏകദിന ടീമിലേക്ക് മടങ്ങിയെത്തുന്നത്. കെ.എൽ. രാഹുൽ പ്രധാന വിക്കറ്റ് കീപ്പറായി തുടരുമ്പോൾ, ബാക്കപ്പ് കീപ്പറായിട്ടാണ് ഇഷാനെ പരിഗണിക്കുന്നത്. ടോപ് ഓർഡറിലും മിഡിൽ ഓർഡറിലും ബാറ്റ് ചെയ്യാനുള്ള മികവും ഇടംകൈയ്യൻ ബാറ്ററാണെന്നതും ഇഷാന് അനുകൂല ഘടകങ്ങളായി.

അതേസമയം, മോശം ഫോമിനെ തുടർന്ന് റിഷഭ് പന്തിന് ഏകദിന ടീമിലെ സ്ഥാനം നഷ്ടമായേക്കും. കഴിഞ്ഞ ഐപിഎല്ലിൽ പന്തിന് പ്രതീക്ഷിച്ച പ്രകടനം പുറത്തെടുക്കാൻ കഴിഞ്ഞിരുന്നില്ല. റിഷഭ് പന്തിന് പകരം ടീമിലെ രണ്ടാമത്തെ കീപ്പറായി ഇഷാൻ കിഷൻ വരുന്നത് ടീമിന് കൂടുതൽ ബാറ്റിംഗ് ഓപ്ഷനുകൾ നൽകുമെന്നാണ് സെലക്ടർമാരുടെ വിലയിരുത്തൽ. സഞ്ജു സാംസൺ ടി20യിൽ തിളങ്ങിയെങ്കിലും ഏകദിനത്തിൽ തൽക്കാലം ഇഷാനെ പരീക്ഷിക്കാനാണ് നീക്കം.

സീനിയർ ഓൾറൗണ്ടർ രവീന്ദ്ര ജഡേജയുടെ ഏകദിന കരിയറിലും നിർണായക തീരുമാനങ്ങൾ ഉണ്ടായേക്കുമെന്നാണ് വിവരം. കഴിഞ്ഞ കുറച്ചു കാലമായി വൈറ്റ് ബോൾ ക്രിക്കറ്റിൽ ജഡേജയുടെ പ്രകടനം തൃപ്തികരമല്ല. ദക്ഷിണാഫ്രിക്ക, ന്യൂസിലാൻഡ് പരമ്പരകളിൽ ബാറ്റിംഗിലും ബൗളിംഗിലും ജഡേജ പരാജയപ്പെട്ടിരുന്നു. വിക്കറ്റ് വീഴ്ത്തുന്നതിലും റൺസ് കണ്ടെത്തുന്നതിലും താരം പിന്നിലായതോടെ യുവതാരങ്ങൾക്ക് അവസരം നൽകുന്നതിനെക്കുറിച്ച് സെലക്ഷൻ കമ്മിറ്റി ഗൗരവമായി ആലോചിക്കുന്നുണ്ട്.