ചന്ദ്രനിലേക്ക് ഇനി കുറഞ്ഞ ചെലവിൽ പോകാം; പുത്തൻ ഇന്ധനക്ഷമതാ പാത കണ്ടെത്തി ശാസ്ത്രജ്ഞർ

സാവോ പോളോ: ചന്ദ്രനിലേക്കുള്ള ബഹിരാകാശ യാത്രകൾ എന്നും അത്യന്തം ചെലവേറിയതും സാങ്കേതിക വെല്ലുവിളികൾ നിറഞ്ഞതുമായിരുന്നു. വൻതോതിൽ ആവശ്യമായി വരുന്ന ഇന്ധനച്ചെലവാണ് ഇത്തരം ദൗത്യങ്ങളുടെ പ്രധാന പ്രതിസന്ധി. എന്നാൽ, ഭാവിയിലെ ചന്ദ്രദൗത്യങ്ങളുടെ ചെലവ് ഗണ്യമായി കുറയ്ക്കാൻ സഹായിക്കുന്ന, കൂടുതൽ ഇന്ധനക്ഷമതയുള്ള പുതിയൊരു യാത്രാപാത കണ്ടെത്തിയിരിക്കുകയാണ് അന്താരാഷ്ട്ര ഗവേഷക സംഘം.

പുത്തൻ സാങ്കേതികവിദ്യയിലൂടെയുള്ള കണ്ടെത്തൽ

സാവോ പോളോ സർവകലാശാലയിലെയും കോയിംബ്ര സർവകലാശാലയിലെയും ഗവേഷകർ ചേർന്ന് നടത്തിയ പഠനത്തിലാണ് ഈ നിർണായക കണ്ടെത്തൽ. ‘തിയറി ഓഫ് ഫങ്ഷണൽ കണക്ഷൻസ്’ (Theory of Functional Connections) എന്ന അത്യാധുനിക സാങ്കേതികവിദ്യ ഉപയോഗിച്ചായിരുന്നു പഠനം. വളരെ സങ്കീർണ്ണമായ ഭ്രമണപഥ കണക്കുകൂട്ടലുകൾ കുറഞ്ഞ കമ്പ്യൂട്ടിംഗ് ശേഷി ഉപയോഗിച്ച് നിർവഹിക്കാൻ ഈ സാങ്കേതികവിദ്യ ഗവേഷകരെ സഹായിച്ചു. അന്താരാഷ്ട്ര ശാസ്ത്ര ജേണലായ ‘ആസ്ട്രോഡൈനാമിക്‌സിൽ’ (Astrodynamics) ഈ പഠനവിവരങ്ങൾ പ്രസിദ്ധീകരിച്ചിട്ടുണ്ട്.

ഭൂമിയിലെയും ചന്ദ്രനിലെയും ഗുരുത്വാകർഷണ ശക്തികളെ അടിസ്ഥാനമാക്കി ഗവേഷകർ ഏകദേശം 30 ദശലക്ഷം വ്യത്യസ്ത പാതകളാണ് പരിശോധിച്ചത്. ഇതിൽ 2,80,000 പാതകളുടെ വിശദാംശങ്ങൾ പഠനവിധേയമാക്കി. സാധാരണയായി ഏറ്റവും കുറഞ്ഞ ദൂരമുള്ള പാതയാണ് ഏറ്റവും കാര്യക്ഷമമെന്ന് കരുതപ്പെടാറുള്ളത്. എന്നാൽ ഈ പരമ്പരാഗത ചിന്തയെ തിരുത്തുന്നതാണ് പുതിയ കണ്ടെത്തൽ. ചന്ദ്രന്റെ ഭൂമിയോട് അടുത്ത ഭാഗത്തുനിന്ന് പ്രവേശിക്കുന്നതിനേക്കാൾ, ചന്ദ്രന്റെ മറുവശത്തുകൂടി (Far side) സമീപിക്കുന്ന പാതയാണ് കൂടുതൽ ഇന്ധനക്ഷമമെന്ന് ഗവേഷകർ കണ്ടെത്തി.

ഇന്ധനക്ഷമതയ്ക്ക് പുറമെ, ഭൂമിയുമായുള്ള ആശയവിനിമയം തുടർച്ചയായി നിലനിർത്താൻ സാധിക്കും എന്നതാണ് ഈ പുതിയ പാതയുടെ മറ്റൊരു പ്രധാന നേട്ടം. നാസയുടെ ആർട്ടെമിസ് 2 ദൗത്യത്തിനിടെ ബഹിരാകാശയാത്രികർ ചന്ദ്രന്റെ മറുവശത്തുകൂടി കടന്നുപോയപ്പോൾ ഭൂമിയുമായുള്ള ആശയവിനിമയം താൽക്കാലികമായി നഷ്‍ടപ്പെട്ടിരുന്നു. എന്നാൽ പുതിയ പാത ഉപയോഗിച്ചാൽ ഇത്തരം സാങ്കേതിക തടസ്സങ്ങൾ പൂർണ്ണമായി ഒഴിവാക്കാൻ സാധിക്കുമെന്നാണ് ശാസ്ത്രജ്ഞരുടെ വിലയിരുത്തൽ. ഭാവിയിലെ മനുഷ്യന്റെ ചന്ദ്രദൗത്യങ്ങൾക്കും ചരക്കു ഗതാഗതത്തിനും വലിയ മാറ്റങ്ങൾ വരുത്താൻ ഈ കണ്ടെത്തലിന് സാധിക്കും.