ഭാരതീയ ശാസ്ത്രത്തിന്റെ പ്രചാരകനായ ശാസ്ത്രജ്ഞനും പ്രഭാഷകനുമായ ഡോ. എൻ ഗോപാലകൃഷ്ണൻ അന്തരിച്ചു; വിടവാങ്ങിയത് തത്വമയിയുടെ അഭ്യുദയകാംക്ഷിയും സ്ഥിരം പ്രേക്ഷനുമായ ദേശീയവാദി

കൊച്ചി: പ്രമുഖ ശാസ്ത്രജ്ഞനും പ്രഭാഷകനുമായ ഡോ. എൻ ഗോപാലകൃഷ്ണൻ വിടവാങ്ങി. 68 വയസായിരുന്നു. ഇന്ന് രാത്രി 09:00 മണിയോടെ എറണാകുളത്തെ സ്വകാര്യ ആശുപത്രിയിൽ ഹൃദയാഘാതത്തെ തുടർന്നായിരുന്നു അന്ത്യം. തത്വമയിയുടെ സ്ഥിരം പ്രേക്ഷകനും അഭ്യുദയകാംക്ഷിയുമായിരുന്നു അദ്ദേഹം. വാർത്തകളും റിപ്പോർട്ടുകളും വിലയിരുത്തി അദ്ദേഹം നിരന്തരം ആശയവിനിമയം നടത്തിയിരുന്നു. ഡോ എൻ ഗോപാലകൃഷ്ണന്റെ നിര്യാണത്തിൽ തത്വമയി എഡിറ്റർ ഇൻ ചീഫ് രാജേഷ് പിള്ള അനുശോചനം രേഖപ്പെടുത്തി.

ഇന്ത്യൻ ഇൻസ്റ്റിറ്റ്യൂട്ട് ഓഫ് സയന്‍റിഫിക് ഹെറിറ്റേജ് ഡയറക്ടറായിരുന്നു ഡോ. എൻ. ഗോപാലകൃഷ്ണൻ. അൻപതോളം ഗവേഷണ പ്രബന്ധങ്ങൾ ദേശീയ അന്തർദേശീയ ജേർണലുകളിൽ അദ്ദേഹത്തിന്റേതായി പ്രസിദ്ധീകരിച്ചിട്ടുണ്ട്. സനാതന ധർമ്മത്തിന്റെ അതുല്യ പ്രചാരകനായാണ് അദ്ദേഹം ഏറെയും അറിയപ്പെട്ടത്. അദ്ദേഹത്തിന്റെ പ്രഭാഷണങ്ങളും ലേഖനങ്ങളും ഹിന്ദു സംഘടനാ പ്രവർത്തനങ്ങൾക്ക് എന്നും ഊർജ്ജമായിട്ടുണ്ട്. അദ്ധ്യാത്മിക വിഷയങ്ങളിൽ അഗാധമായ പാണ്ഡിത്യം ഉണ്ടായിരുന്ന വ്യക്തിത്വമായിരുന്നു അദ്ദേഹം.