ലൈംഗിക അതിക്രമക്കേസ്‌! രഞ്ജിത്തിനെതിരെ കുറ്റപത്രം ഇന്ന് സമർപ്പിക്കും!കുറ്റക്കാരനെന്നും തെളിവുകളുണ്ടെന്നും കുറ്റപത്രത്തിൽ പരാമർശം

കൊച്ചി : ചലച്ചിത്ര സംവിധായകൻ രഞ്ജിത്തിനെതിരായ ലൈംഗികാതിക്രമ കേസിൽ പ്രത്യേക അന്വേഷണസംഘം ഇന്ന് കോടതിയിൽ കുറ്റപത്രം സമർപ്പിക്കും. ഉന്നത പോലീസ് ഉദ്യോഗസ്ഥരുടെ അന്തിമ അനുമതി ലഭിച്ചതിനെ തുടർന്ന് കുറ്റപത്രം ഓൺലൈനായി അപ്‌ലോഡ് ചെയ്യാനാണ് പോലീസിന്റെ നീക്കം. രണ്ടര മാസം നീണ്ടുനിന്ന വിശദമായ അന്വേഷണത്തിനൊടുവിലാണ് കൊച്ചി ഡിസിപിയുടെ നേതൃത്വത്തിലുള്ള പ്രത്യേക അന്വേഷണസംഘം കുറ്റപത്രം തയ്യാറാക്കിയത്.

കേസിൽ സംവിധായകൻ രഞ്ജിത്തിനെതിരെ ശക്തമായ തെളിവുകൾ ശേഖരിക്കാൻ കഴിഞ്ഞിട്ടുണ്ടെന്നാണ് അന്വേഷണസംഘത്തിൽ നിന്നും ലഭിക്കുന്ന സൂചനകൾ. ഇരയായ യുവനടിയുടെ വിശദമായ രഹസ്യമൊഴിക്ക് പുറമെ, സംഭവദിവസത്തെ സാഹചര്യത്തെളിവുകളും സാക്ഷിമൊഴികളും രഞ്ജിത്തിന് പൂർണ്ണമായും പ്രതികൂലമാണ്. ഈ തെളിവുകളെല്ലാം കൃത്യമായി രേഖപ്പെടുത്തിയ ശേഷമാണ് പോലീസ് കോടതിയെ സമീപിക്കുന്നത്.

ഫോർട്ട് കൊച്ചിയിലെ സിനിമ ഷൂട്ടിങ് ലൊക്കേഷനിൽ വെച്ച് കാരവാനിലേക്ക് വിളിച്ചുവരുത്തിയ ശേഷം രഞ്ജിത് തന്നോട് അപമര്യാദയായി പെരുമാറി എന്നാണ് യുവനടിയുടെ പരാതി. രഞ്ജിത് പുതുതായി സംവിധാനം ചെയ്യുന്ന ചിത്രത്തിൽ അഭിനയിക്കാൻ എത്തിയതായിരുന്നു ഈ നടി. മാനഭംഗം, ലൈംഗികാതിക്രമം, തടഞ്ഞുവെക്കൽ, അശ്ലീല ആംഗ്യം കാണിക്കൽ തുടങ്ങിയ കടുത്ത നാല് ജാമ്യമില്ലാ വകുപ്പുകൾ ചുമത്തിയാണ് പോലീസ് കേസ് രജിസ്റ്റർ ചെയ്തിരിക്കുന്നത്.

കഴിഞ്ഞ മാർച്ച് 28-ാം തീയതിയാണ് നടിയുടെ പരാതി പോലീസിന് ലഭിക്കുന്നത്. തുടർന്ന് എറണാകുളം നോർത്ത് വനിതാ പോലീസ് സ്റ്റേഷനിൽ എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു. കേസിന്റെ പശ്ചാത്തലത്തിൽ മുൻപ് തൊടുപുഴയിൽ വെച്ച് പോലീസ് സംഘം രഞ്ജിത്തിന്റെ അറസ്റ്റ് രേഖപ്പെടുത്തിയിരുന്നുവെങ്കിലും അദ്ദേഹം നിലവിൽ കോടതി അനുവദിച്ച ജാമ്യത്തിലാണ്. കുറ്റപത്രം സമർപ്പിക്കുന്നതോടെ കേസിലെ വിചാരണ നടപടികളിലേക്ക് കോടതി ഉടൻ കടക്കും.