കോഴിക്കോട്ട് പാമ്പുകടിയും ഭീതിയും; രണ്ട് പേർ ചികിത്സയിൽ, വീടിനുള്ളിൽ നിന്ന് അഞ്ച് വിഷപ്പാമ്പുകളെ കണ്ടെത്തി

കോഴിക്കോട്: ജില്ലയിൽ പാമ്പുകടിയും വീടുകൾക്കുള്ളിൽ പാമ്പുകളുടെ സാന്നിധ്യവും വർധിക്കുന്ന സാഹചര്യത്തിൽ ജനങ്ങൾ അതീവ ജാഗ്രതയിൽ. പേരാമ്പ്രയിലും പൂനൂരിലുമായി രണ്ട് പേർക്കാണ് പാമ്പുകടിയേറ്റത്. പേരാമ്പ്ര കണ്ണിപ്പൊയിലിലെ ‘ചിത്രാഞ്ജലി’യിൽ അഞ്ജലി (36), പൂനൂർ സ്വദേശി മുഹമ്മദ് അൻസാർ (22) എന്നിവരാണ് മെഡിക്കൽ കോളേജ് ആശുപത്രിയിൽ ചികിത്സയിലുള്ളത്. ശംഖുവരയൻ ഇനത്തിൽപ്പെട്ട പാമ്പാണ് അഞ്ജലിയെ കടിച്ചത്. ഉറക്കത്തിനിടെ കിടക്കയിൽ വെച്ചാണ് അൻസാറിന് പാമ്പുകടിയേറ്റത്.

സംസ്ഥാനത്ത് അടുത്തിടെയായി പാമ്പുകടിയേറ്റുള്ള മരണങ്ങളും റിപ്പോർട്ട് ചെയ്യപ്പെടുന്നുണ്ട്. ഇടുക്കി കാഞ്ഞാർ സ്വദേശി വിശാലാക്ഷി (75), കണ്ണൂർ തളിപ്പറമ്പ് പട്ടുവത്ത് വീട്ടിൽ നബീസ (70) എന്നിവർ പാമ്പുകടിയേറ്റ് മരിച്ചത് അടുത്തിടെയാണ്.

ഇതിനിടയിലാണ് കോഴിക്കോട് കുറ്റ്യാടി മീത്തലെ കാപ്പുമ്മൽ രമേശിന്റെ വീട്ടിൽ അഞ്ച് വിഷപ്പാമ്പുകളെ കണ്ടെത്തിയത്. അതീവ വിഷമുള്ള വെള്ളിക്കെട്ടൻ ഇനത്തിൽപ്പെട്ട പാമ്പുകളെയാണ് വീടിന്റെ വിവിധ മുറികളിൽ നിന്നും കണ്ടെത്തിയത്. കുട്ടികൾ കിടന്നുറങ്ങിയിരുന്ന കട്ടിലിലാണ് ആദ്യം പാമ്പിനെ കണ്ടത്. ഉടൻ തന്നെ വീട്ടുകാർ കുട്ടികളെ മാറ്റി സുരക്ഷിതരാക്കിയതിനാൽ വലിയൊരു ദുരന്തമാണ് ഒഴിവായത്. തുടർന്ന് നടത്തിയ പരിശോധനയിലാണ് മറ്റ് മുറികളിലും പാമ്പുകൾ ഒളിച്ചിരിക്കുന്നതായി കണ്ടെത്തിയത്.

സംസ്ഥാനത്ത് വേനൽച്ചൂട് കടുത്തതോടെ തണുപ്പുള്ള സ്ഥലങ്ങൾ തേടി പാമ്പുകൾ വീടിനുള്ളിലേക്ക് കയറുന്നത് പതിവാകുകയാണ്. രാത്രികാലങ്ങളിൽ നിലത്ത് കിടന്നുറങ്ങുന്നവർ അതീവ ജാഗ്രത പാലിക്കണമെന്നും വീടിനു പരിസരം വൃത്തിയായി സൂക്ഷിക്കണമെന്നും വനം വകുപ്പ് കർശന നിർദ്ദേശം നൽകി.