കോഴിക്കോട് അതിരാത്രം സമാപിച്ചു; ചരിത്രമുഹൂർത്തമായി പൂർണാഹുതി

കോഴിക്കോട്: ആചാര്യശ്രീ രാജേഷിന്റെ നേതൃത്വത്തിൽ കോഴിക്കോട് വേദമന്ദിരത്തിൽ ഏപ്രിൽ 17 മുതൽ നടന്നുവന്ന അതിരാത്രം പത്തു ദിവസത്തെ ചടങ്ങുകൾക്ക് ശേഷം പൂർണാഹൂതിയോടെ സമാപിച്ചു. കർണാടക ശിവമോഗ സ്വദേശിയായ ജയതീർത്ഥയായിരുന്നു ഈ യജ്ഞത്തിന്റെ യജമാനൻ. പ്രധാന യാഗത്തിന്റെ സമാപനത്തിൽ ആചാര്യശ്രീ രാജേഷും ഹോതാവ് രവീന്ദ്രനും ചേർന്ന് പൂർണാഹുതി സമർപ്പിച്ചു.

അതിരാത്രം പ്രകൃതിയിലും അന്തരീക്ഷത്തിലുമുണ്ടാക്കുന്ന മാറ്റങ്ങൾ പഠിക്കുന്നതിനായി വിവിധ സ്ഥാപനങ്ങളിൽ നിന്നുള്ള വിദഗ്ധർ സ്ഥലത്തെത്തിയിരുന്നു. ഇന്ത്യൻ ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സിലെ പ്രൊഫ. അജയ് സക്സേന, കോഴിക്കോട് ഐ.ഐ.എം പ്രതിനിധികൾ, അമൃത വിശ്വവിദ്യാപീഠത്തിലെ പ്രൊഫ. ഡോ. ജഡു, പ്രൊഫ. സുശ്രുത ശിവണ്ണ തുടങ്ങിയവർ നിരീക്ഷണങ്ങൾക്കായി എത്തിയിരുന്നു. സ്പെക്ട്രോസ്കോപിക് പഠനത്തിലൂടെ യജ്ഞം പരിസ്ഥിതിയിലുണ്ടാക്കുന്ന സ്വാധീനത്തെക്കുറിച്ച് ഇവർ വിശദമായി പരിശോധിച്ചു.

അതിരാത്രത്തോടനുബന്ധിച്ച് കാശ്യപ വേദ റിസർച്ച് ഫൗണ്ടേഷൻ ഏർപ്പെടുത്തിയ സംഗീതഭാരതി പുരസ്കാരം പ്രശസ്ത ഗായകൻ എം.ജി. ശ്രീകുമാറിന് സമ്മാനിച്ചു. കാശ്യപ വേദ റിസർച്ച് ഫൗണ്ടേഷൻ ട്രസ്റ്റി പി.ടി. വിപിൻ അധ്യക്ഷത വഹിച്ച ചടങ്ങിലാണ് പുരസ്കാരം നൽകിയത്. 11,111 രൂപയും പ്രശസ്തി ഫലകവുമടങ്ങുന്നതാണ് പുരസ്കാരം.