ലൈംഗിക കുറ്റവാളി ജെഫ്രി എപ്സ്റ്റീൻ നടത്തിയ പാർട്ടിയിൽ സൊഹ്റാൻ മംദാനിയുടെ മാതാവും സംവിധായികയുമായ മീര നായർ പങ്കെടുത്തു !! രേഖകൾ പുറത്ത് വിട്ട് അമേരിക്കൻ നീതിന്യായ വകുപ്പ്

ന്യൂയോർക്ക് : കുപ്രസിദ്ധ ലൈംഗിക കുറ്റവാളി ജെഫ്രി എപ്സ്റ്റീൻ നടത്തിയ പാർട്ടിയിൽ ന്യൂയോർക്ക് മേയർ സൊഹ്റാൻ മംദാനിയുടെ മാതാവും സംവിധായികയുമായ മീര നായരും പങ്കെടുത്തുവെന്ന് വിവരം. അമേരിക്കൻ നീതിന്യായ വകുപ്പ് പുറത്തുവിട്ട മുപ്പത് ലക്ഷത്തോളം പേജുകൾ വരുന്ന രേഖകളിലാണ് മീര നായരുടെ പേരും ഉൾപ്പെട്ടിരിക്കുന്നത്.

2009 ഒക്ടോബറിൽ മീര നായർ സംവിധാനം ചെയ്ത ‘അമേലിയ’ എന്ന ചിത്രത്തിന്റെ പ്രദർശനത്തിന് ശേഷം നടന്ന ജെഫ്രി എപ്‌സ്റ്റൈൻ ആതിഥേയത്വം വഹിച്ച വിരുന്നിൽ അവർ പങ്കെടുത്തതായാണ് രേഖകൾ വ്യക്തമാക്കുന്നത്. സെക്സ് ട്രാഫിക്കിംഗ് കേസിൽ ശിക്ഷിക്കപ്പെട്ട ഗിസ്‌ലെയ്ൻ മാക്‌സ്‌വെല്ലിന്റെ വസതിയിൽ വെച്ചാണ് ഈ വിരുന്ന് നടന്നത്. പ്രമുഖ പബ്ലിസിസ്റ്റ് പെഗ്ഗി സീഗൽ ജെഫ്രി എപ്‌സ്റ്റൈന് അയച്ച ഇമെയിലിലാണ് ഈ വിവരങ്ങളുള്ളത്. മുൻ അമേരിക്കൻ പ്രസിഡന്റ് ബിൽ ക്ലിന്റൺ, ആമസോൺ മേധാവി ജെഫ് ബെസോസ് എന്നിവരും ഈ ചടങ്ങിൽ സന്നിഹിതരായിരുന്നുവെന്ന് ഇമെയിൽ വെളിപ്പെടുത്തുന്നു. മീര നായരുടെ ചിത്രത്തിന് വിരുന്നിൽ സമ്മിശ്ര പ്രതികരണമാണ് ലഭിച്ചതെന്നും സീഗലിന്റെ സന്ദേശത്തിൽ പരാമർശമുണ്ട്.

അതേസമയം, ടെസ്‌ല സിഇഒ ഇലോൺ മസ്കും എപ്‌സ്റ്റൈനും തമ്മിലുള്ള ഇമെയിൽ സംഭാഷണങ്ങളും പുറത്തുവന്ന രേഖകളിൽ ഉൾപ്പെടുന്നു. 2012 നവംബറിൽ എപ്‌സ്റ്റൈന്റെ സ്വകാര്യ ദ്വീപിൽ നടക്കുന്ന വിരുന്നിനെക്കുറിച്ച് ഇരുവരും സംസാരിച്ചതായാണ് കണ്ടെത്തൽ. ദ്വീപിലേക്ക് എത്ര പേർ വരുമെന്ന എപ്‌സ്റ്റൈന്റെ ചോദ്യത്തിന്, താനും പങ്കാളിയും മാത്രമുണ്ടാകുമെന്നും ഏത് ദിവസമാണ് ഏറ്റവും വലിയ വിരുന്ന് നടക്കുകയെന്നും മസ്ക് മറുപടി നൽകിയതായി രേഖകൾ സൂചിപ്പിക്കുന്നു. ലക്ഷക്കണക്കിന് ചിത്രങ്ങളും അയ്യായിരത്തോളം വീഡിയോകളും ഉൾപ്പെടുന്ന ഈ വമ്പൻ രേഖാശേഖരം വരും ദിവസങ്ങളിൽ കൂടുതൽ പ്രമുഖരെ പ്രതിക്കൂട്ടിലാക്കുമെന്നാണ് സൂചന.