പ്രമുഖ സോഫ്റ്റ്വെയർ സ്ഥാപനമായ സോഹോ കോർപ്പറേഷന്റെ സിഇഒ സ്ഥാനമൊഴിഞ്ഞ് ശ്രീധർ വെമ്പു. സമൂഹ മാദ്ധ്യമായ എക്സിലൂടെയാണ് അദ്ദേഹം ഇക്കാര്യം അറിയിച്ചത്. കമ്പനിയുടെ ഗവേഷണ-വികസന സംരംഭങ്ങളുടെ ഉത്തരവാദിത്തം വഹിക്കുന്ന ചീഫ് സയൻ്റിസ്റ്റായി അദ്ദേഹം തുടരും. നിർമ്മിത ബുദ്ധിയുടെ സമീപകാല സംഭവവികാസങ്ങളുടെ പശ്ചാത്തലത്തില് കമ്പനി നേരിടുന്ന വിവിധ വെല്ലുവിളികളും അവസരങ്ങളും കണക്കിലെടുത്ത് ഗവേഷണ-വികസന പ്രവര്ത്തനങ്ങളില് മുഴുവൻ സമയവും ശ്രദ്ധ കേന്ദ്രീകരിക്കാനാണ് തീരുമാനമെന്ന് വെമ്പു പറഞ്ഞു.
കമ്പനിയുടെ സഹസ്ഥാപകൻ ശൈലേഷ് കുമാർ ഡേവിയാണ് പുതിയ സിഇഒ. സോഹോ യുഎസിനെ സഹസ്ഥാപകൻ ടോണി തോമസ് നയിക്കും. ക്ലൗഡ് അധിഷ്ഠിത ബിസിനസ് സോഫ്റ്റ്വെയർ വികസിപ്പിക്കുന്ന സോഹോയുടെ സ്ഥാപകരില് ഒരാളാണ് വെമ്പു. പ്രിൻസ്റ്റണിൽ നിന്ന് ഇലക്ട്രിക്കൽ എഞ്ചിനീയറിംഗിൽ പിഎച്ച്.ഡി അദ്ദേഹം നേടിയിട്ടുണ്ട് .
