സ്വാതന്ത്ര്യദിന പിറ്റേന്ന് വന്ദേഭാരത് എക്സ്പ്രസിനുനേരെയുണ്ടായ കല്ലേറ് ; ഭാര്യയുമായി വഴക്കിട്ട് പിണങ്ങിയതിന്റെ ദേഷ്യത്തിലാണെന്ന് പ്രതി സൈബീസിന്റെ മൊഴി; സംഭവം കൃത്യമായ ആസൂത്രണത്തോടെയാണ് നടന്നതെന്ന നിഗമനത്തിൽ അന്വേഷണ സംഘം ! ഓടുന്ന ട്രെയിനിനു നേരെ കല്ലെറിഞ്ഞുവെന്ന കുറ്റം തെളിയിക്കപ്പെട്ടാൽ ലഭിക്കുന്നത് പത്തുവർഷം വരെയുള്ള തടവു ശിക്ഷ

കണ്ണൂർ : മാഹി റെയിൽവെ സ്റ്റേഷനു സമീപം ഇക്കഴിഞ്ഞ 16 ന് വന്ദേഭാരത് എക്സ്പ്രസിനുനേരെ കല്ലേറുണ്ടായ സംഭവത്തിൽ അറസ്റ്റിലായ യുവാവിന്റെ മൊഴിയിൽ അടിമുടി ദുരൂഹത. പരസ്പര വിരുദ്ധവും അവിശ്വസനീയമായ മൊഴികൾ നൽകുന്നതാണ് അന്വേഷണ സംഘത്തെ കുഴയ്ക്കുന്നത്. എന്നാൽ സംഭവം കൃത്യമായ ആസൂത്രണത്തോടെയാണ് നടന്നതെന്നാണ് അന്വേഷണ സംഘം കരുതുന്നത്. ഇക്കാര്യത്തിൽ വിശദമായ അന്വേഷണത്തിനൊരുങ്ങുകയാണ് ഉദ്യോഗസ്ഥർ. പ്രതി മാഹി സ്വദേശിയും മലപ്പുറ കൊണ്ടോട്ടി തുറക്കൂലിലെ താമസക്കാരനുമായ എം പി സൈബീസിനെ സെപത്ംബർ ഏഴുവരെയാണ് കോടതി റിമാൻഡ് ചെയ്തിട്ടുണ്ട്. വന്ദേഭാരതിന്റെ സി.18- കോച്ചിനു നേരെ കല്ലേറുണ്ടായത്. സി.സി.ടി.വി ദൃശ്യങ്ങൾ കേന്ദ്രീകരിച്ചു ആർപിഎഫ് ക്രൈം ഡിറ്റക്ഷൻ വിഭാഗം നടത്തിയ അന്വേഷത്തിലാണ് പ്രതി കുടുങ്ങിയത്. വന്ദേഭാരത് എക്സ്പ്രസിലെ പതിനഞ്ച് സിസി ടിവി ക്യാമറകളിലെ ദൃശ്യങ്ങളും മാഹി റെയിൽവെ സ്റ്റേഷൻ പരിസരത്തെ അൻപതു സിസി ടിവി ദൃശ്യങ്ങളും ഇതിനായി പരിശോധിച്ചു.

ഫോണിൽ സംസാരിക്കവെ ഭാര്യയുമായി വഴക്കിട്ട് പിണങ്ങിയെന്നും അതിന്റെ ദേഷ്യത്തിലാണ് താൻ ട്രെയിനിനു നേരെ കല്ലെറിഞ്ഞതെന്നുമാണ് ഇയാളുടെ മൊഴി. എന്നാൽ അന്വേഷണ സംഘം ഇത് വിശ്വസിച്ചിട്ടില്ല. പ്രതിയെ ജുഡീഷ്യൽ കസ്റ്റഡിയിൽ നിന്നും വിട്ടുകിട്ടാൻ ഹരജി നൽകുമെന്നും സംഭവത്തിന്റെ സത്യാവസ്ഥയറിയാൻ വിശദമായി ചോദ്യം ചെയ്യുമെന്നും അന്വേഷണ ഉദ്യോഗസ്ഥർ അറിയിച്ചു. ഓടുന്ന ട്രെയിനിനു നേരെ കല്ലെറിഞ്ഞുവെന്ന കുറ്റം തെളിയിക്കപ്പെട്ടാൽ പത്തുവർഷം വരെ തടവു ശിക്ഷ ലഭിക്കാവുന്ന കുറ്റമാണ്.