ഭീകരവാദത്തിന് പിന്തുണ നൽകുന്നത് നിർത്തുക, അല്ലെങ്കിൽ ഭൂപടത്തിൽ നിന്ന് അപ്രത്യക്ഷമാകും! പാകിസ്ഥാന് താക്കീതുമായി കരസേനാ മേധാവി ജനറൽ ഉപേന്ദ്ര ദ്വിവേദി

ദില്ലി : ഭീകരവാദത്തിന് നൽകുന്ന പിന്തുണ അവസാനിപ്പിച്ചില്ലെങ്കിൽ പാകിസ്ഥാന്റെ ഭൗമപരമായ നിലനിൽപ്പ് ഇല്ലാതാകുമെന്ന് ഭാരതത്തിന്റെ ശക്തമായ മുന്നറിയിപ്പ്. ഭൂപടത്തിൽ സ്വന്തം സ്ഥാനം നിലനിർത്തണമെങ്കിൽ പാകിസ്ഥാൻ ഭീകരവാദത്തിന് നൽകുന്ന ഭരണകൂട പിന്തുണ നിർത്തണമെന്ന് കരസേനാ മേധാവി ജനറൽ ഉപേന്ദ്ര ദ്വിവേദി മുന്നറിയിപ്പ് നൽകി

രാജസ്ഥാനിലെ അനൂപ്ഗഡിലെ ഒരു സൈനിക പോസ്റ്റിൽ സംസാരിക്കവെയാണ് ജനറൽ ദ്വിവേദി ഈ മുന്നറിയിപ്പ് നൽകിയത്. ഇത്തവണ ഇന്ത്യൻ സേന സംയമനം പാലിക്കില്ലെന്നും, പാകിസ്ഥാൻ ഭീകരത കയറ്റുമതി ചെയ്യുന്നത് നിർത്താൻ തയ്യാറായില്ലെങ്കിൽ ‘ഓപ്പറേഷൻ സിന്ദൂർ’ന്റെ രണ്ടാം പതിപ്പ് വിദൂരമല്ലെന്നും അദ്ദേഹം സൂചന നൽകി.

“ഓപ്പറേഷൻ സിന്ദൂർ 1.0-ൽ ഞങ്ങൾ പാലിച്ച സംയമനം ഇത്തവണ ഉണ്ടാകില്ല. ഇത്തവണ ഞങ്ങൾ പാകിസ്ഥാൻ ഭൂമിശാസ്ത്രത്തിൽ സ്വന്തം സ്ഥാനം നിലനിർത്തണോ എന്ന് ചിന്തിപ്പിക്കും വിധമുള്ള നടപടി സ്വീകരിക്കും. ഭൂപടത്തിൽ നിലനിൽക്കണമെങ്കിൽ പാകിസ്ഥാൻ ഭരണകൂടം സ്പോൺസർ ചെയ്യുന്ന ഭീകരവാദം അവസാനിപ്പിക്കണം,” രാജസ്ഥാനിലെ സൈനിക പോസ്റ്റിൽ വെച്ച് അദ്ദേഹം പറഞ്ഞു.

സൈനികർ തയ്യാറായിരിക്കാനും അദ്ദേഹം ആവശ്യപ്പെട്ടു. “ദൈവം ഉദ്ദേശിച്ചാൽ, നിങ്ങൾക്ക് ഉടൻ അവസരം ലഭിക്കും. എല്ലാവിധ ആശംസകളും,” കരസേനാ മേധാവി കൂട്ടിച്ചേർത്തു.

‘ഓപ്പറേഷൻ സിന്ദൂരി’ന്റെ സമയത്ത് ഇന്ത്യൻ സേന അമേരിക്കൻ നിർമ്മിത എഫ്-16 യും ചൈനീസ് ജെഎഫ്-17 യും ഉൾപ്പെടെ പത്തോളം പാക് വിമാനങ്ങൾ വെടിവെച്ചിട്ടുവെന്ന വ്യോമസേനാ മേധാവി എ.പി. സിംഗിന്റെ പ്രസ്താവനയ്ക്ക് പിന്നാലെയാണ് ജനറൽ ദ്വിവേദിയുടെ ഈ മുന്നറിയിപ്പ്,