മുംബൈയിൽ ഭക്ഷ്യ വിഷബാധയെന്ന് സംശയം ! ബിരിയാണിയും തണ്ണിമത്തനും കഴിച്ച ഒരു കുടുംബത്തിലെ നാലുപേർ മരിച്ചു

മുംബൈയിലെ പൈധോണിയിൽ ഒരു കുടുംബത്തിലെ നാല് പേർ മരിച്ചത് ഭക്ഷ്യ വിഷബാധയേറ്റെന്ന് സംശയം. 40 വയസ്സുകാരനായ അബ്ദുള്ള ദൊകാഡിയ, 35 വയസ്സുകാരിയായ ഭാര്യ നസ്രീൻ, ഇവരുടെ മക്കളായ 16 വയസ്സുകാരി ആയിഷ, 13 വയസ്സുകാരി സൈനബ് എന്നിവരാണ് മരണപ്പെട്ടത്.

ഏപ്രിൽ 25-ന് രാത്രി പത്തരയോടെ ഒമ്പത് അംഗ കുടുംബം ഒരുമിച്ച് അത്താഴമായി ബിരിയാണി കഴിച്ചിരുന്നു. അതിനുശേഷം രാത്രി ഒരു മണിയോടെ കുടുംബാംഗങ്ങൾ തണ്ണിമത്തനുംകഴിച്ചു. പിന്നാലെ പുലർച്ചെ അഞ്ചരയോടെയാണ് നാല് പേർക്കും കടുത്ത ശാരീരിക അസ്വസ്ഥതകൾ അനുഭവപ്പെട്ടത്. ഛർദ്ദിയും വയറിളക്കവും ഉണ്ടായതിനെത്തുടർന്ന് ആദ്യം കുടുംബ ഡോക്ടറെ കാണുകയും പിന്നീട് ചികിത്സയ്ക്കായി ഇവരെ ജെ.ജെ. ആശുപത്രിയിലേക്ക് മാറ്റുകയും ചെയ്തു. എന്നാൽ ചികിത്സയിലിരിക്കെ തന്നെ നാല് പേരും മരണപ്പെടുകയായിരുന്നു.

സംഭവത്തിൽ പോലീസ് അന്വേഷണം ഊർജ്ജിതമാക്കിയിട്ടുണ്ട്. മൃതദേഹങ്ങളുടെ പോസ്റ്റ്‌മോർട്ടം നടപടികൾ പൂർത്തിയായെങ്കിലും ഹിസ്റ്റോപാത്തോളജിക്കൽ റിപ്പോർട്ടുകൾ ലഭിച്ചാൽ മാത്രമേ മരണകാരണം ഔദ്യോഗികമായി സ്ഥിരീകരിക്കാൻ സാധിക്കൂ എന്ന് പോലീസ് അറിയിച്ചു. ജെ.ജെ. മാർഗ് പോലീസ് സ്‌റ്റേഷനിൽ അസ്വാഭാവിക മരണത്തിന് കേസ് രജിസ്റ്റർ ചെയ്ത് അന്വേഷണം നടക്കുകയാണ്. പ്രാഥമിക വിവരങ്ങൾ പ്രകാരം കുടുംബം രാത്രി ബിരിയാണി കഴിച്ചതിന് ശേഷം തണ്ണിമത്തൻ കഴിച്ചിരുന്നു എന്ന് വ്യക്തമായിട്ടുണ്ട്. കൃത്യമായ കാരണം കണ്ടെത്താനുള്ള ശാസ്ത്രീയ പരിശോധനകൾ പുരോഗമിക്കുകയാണ്.