ഇന്ത്യയുടെ 4.5 തലമുറ യുദ്ധവിമാനമായ തേജസ് തകർന്ന് വീണു. ദുബായ് എയർ ഷോയിൽ വ്യോമാഭ്യാസപ്രകടനത്തിനിടെയാണ് യുദ്ധവിമാനം തകർന്നു വീണത്. ഇന്ന് ഉച്ചയ്ക്ക് 2:10-ഓടെ അൽ മക്തൂം അന്താരാഷ്ട്ര വിമാനത്താവളത്തിലാണ് സംഭവം.
പ്രദർശനം കണ്ടുകൊണ്ടിരുന്ന കാഴ്ചക്കാരുടെ മുന്നിൽ വെച്ചാണ് സിംഗിൾ-സീറ്റ് ലൈറ്റ് കോംബാറ്റ് എയർക്രാഫ്റ്റ് ആയ തേജസ് തകർന്നുവീണത്. അപകടത്തെത്തുടർന്ന് വിമാനത്താവളത്തിന് മുകളിൽ കട്ടിയുള്ള കറുത്ത പുക ഉയർന്നു. ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL) ആണ് ഈ വിമാനം നിർമ്മിച്ചത്.
പൈലറ്റ് പുറത്തേക്ക് തെറിച്ചോ (ejection) എന്നതിനെക്കുറിച്ചോ, പൈലറ്റിൻ്റെ ആരോഗ്യനിലയെക്കുറിച്ചോ ആദ്യഘട്ടത്തിൽ ഔദ്യോഗിക വിവരങ്ങൾ ലഭ്യമായിരുന്നില്ല. പൈലറ്റ് അപകടത്തിൽ മരിച്ചതായി അൽപ്പസമയം മുമ്പ് വ്യോമസേന സ്ഥിരീകരിച്ചു.
അഭ്യാസത്തിനിടെ വിമാനം നിയന്ത്രണം നഷ്ടപ്പെട്ട് അതിവേഗം താഴേക്ക് പതിക്കുന്നതിൻ്റെ ദൃശ്യങ്ങൾ പുറത്തുവന്നിട്ടുണ്ട്. 2001-ൽ കന്നിപ്പറക്കൽ നടത്തിയ ശേഷം 23 വർഷത്തെ ചരിത്രത്തിൽ തേജസ് വിമാനത്തിന് സംഭവിക്കുന്ന രണ്ടാമത്തെ അപകടമാണിത്. ഇതിനുമുമ്പ്, 2024 മാർച്ചിൽ രാജസ്ഥാനിലെ ജയ്സാൽമീറിൽ വെച്ച് ഒരു തേജസ് വിമാനം തകർന്നിരുന്നു. ആ അപകടത്തിൽ പൈലറ്റ് സുരക്ഷിതമായി പുറത്തേക്ക് തെറിച്ച് രക്ഷപ്പെട്ടിരുന്നു.
4.5-ാം തലമുറയിൽപ്പെട്ട മൾട്ടി-റോൾ കോംബാറ്റ് വിമാനമാണ് തേജസ്. വ്യോമ പ്രതിരോധം, വ്യോമാക്രമണം, ക്ലോസ്-കോംബാറ്റ് പ്രവർത്തനങ്ങൾ എന്നിവയ്ക്കായി രൂപകൽപ്പന ചെയ്ത ഈ വിമാനം, അതിൻ്റെ വിഭാഗത്തിലെ ഏറ്റവും ഭാരം കുറഞ്ഞതും വലിപ്പം കുറഞ്ഞതുമായ യുദ്ധവിമാനങ്ങളിൽ ഒന്നാണ്.
ടേക്ക്-ഓഫ്, ലാൻഡിംഗ് അല്ലെങ്കിൽ താഴ്ന്ന തലത്തിലുള്ള അഭ്യാസങ്ങൾക്കിടയിൽ പോലും, സീറോ ആൾട്ടിറ്റ്യൂഡിലും സീറോ സ്പീഡിലും പൈലറ്റിന് സുരക്ഷിതമായി പുറത്തുവരാൻ കഴിയുന്ന മാർട്ടിൻ-ബേക്കർ സീറോ-സീറോ ഇജക്ഷൻ സീറ്റ് തേജസ് വിമാനത്തിൻ്റെ ഒരു പ്രധാന സവിശേഷതയാണ്.
