തെലുങ്ക് സീരിയൽ നടൻ ചന്ദ്രകാന്ത് ജീവനൊടുക്കിയ നിലയില്‍ ! പെൺ സുഹൃത്തിന്റെ മരണം മൂലം നടനെ വിഷാദ രോഗം അലട്ടിയിരുന്നതായി പിതാവ്

തെലുങ്ക് സീരിയൽ നടൻ ചന്ദ്രകാന്തിനെ ജീവനൊടുക്കിയ നിലയില്‍ കണ്ടെത്തി. കഴിഞ്ഞ ദിവസം രംഗറെഡ്ഡി ജില്ലയിലെ അൽകാപൂരിലെ വീട്ടിലാണ് ചന്ദ്രകാന്തിനെ മരിച്ച നിലയില്‍ കണ്ടെത്തിയത്. ഈ മാസം 12 നുണ്ടായ വാഹനാപകടത്തിൽ ചന്ദ്രകാന്തിന്‍റെ സഹനടിയും സുഹൃത്തുമായ പവിത്ര ജയറാം മരണപ്പെട്ടിരുന്നു. ഇതിനെത്തുടർന്നുള്ള മനോവിഷമത്താലാണ് ചന്ദ്രകാന്ത് ആത്മഹത്യ ചെയ്തതെന്നാണ് കരുതുന്നത്. നടിയുടെ മരണത്തിന് പിന്നാലെ ചന്ദ്രകാന്ത് വിഷാദരോഗവുമായി മല്ലിടുകയായിരുന്നുവെന്ന് പിതാവ് മൊഴി നൽകിയിട്ടുണ്ട്.

‘ത്രിനയനി’ എന്ന സീരിയലിലാണ് പവിത്രയും ചന്ദ്രകാന്തും ഒന്നിച്ച് അഭിനയിച്ചത്.ഇരുവരും അൽകാപൂരിലെ വീട്ടിൽ ഒന്നിച്ചാണ് താമസിച്ചിരുന്നത്. ഇതേ വസതിയിലാണ് ചന്ദ്രകാന്തിനെ തൂങ്ങിമരിച്ച നിലയിൽ കണ്ടെത്തിയത്.

ഈ മാസം12 നാണ് ഹൈദരാബാദിൽ പവിത്ര ജയറാമിന്‍റെ കാറിൽ ബസ് ഇടിച്ചുണ്ടായ വാഹനാപകടത്തിൽ മരണപ്പെട്ടത്. ഷൂട്ട് കഴിഞ്ഞ് കർണാടകയിലേക്ക് മടങ്ങുന്നതിനിടെയായിരുന്നു അപകടം. ത്രിനയനി എന്ന സീരിയലിലെ അഭിനയത്തിലൂടെയാണ് ചന്ദ്രകാന്ത് പ്രശസ്തി നേടിയത്. പവിത്ര മുമ്പ് വിവാഹിതയും രണ്ട് കുട്ടികളുടെ അമ്മയുമാണ്.