കശ്മീരിൽ ഭീകരവേട്ട തുടർന്ന് സൈന്യം; ലഷ്‌ക്കർ ഭീകരൻ പിടിയിൽ; ആയുധങ്ങളുൾപ്പെടെ പിടിച്ചെടുത്തു

ബാരാമുള്ള: കശ്മീരിൽ ഭീകരവേട്ട തുടർന്ന് സൈന്യം. ബാരാമുള്ളയിൽ നിന്ന് ഒരു ലഷ്‌ക്കർ ഭീകരനെ പിടികൂടി(Terrorist Arrested In Kashmir). ലഷ്‌ക്കർ ഇ തൊയ്ബയുമായി ബന്ധമുള്ളയാളെയാണ് സൈന്യം പിടികൂടിയതെന്നാണ് വിവരം. പിടികൂടിയ ഭീകരനിൽ നിന്നും ഏകെ 56 റൈഫിളും 30 റൗണ്ട് വെടിയുതിർക്കാവുന്നത്ര വെടിയുണ്ടകളും കണ്ടെടുത്തു. ഇതിനുപിന്നാലെ മേഖലയിൽ സൈന്യത്തിന്റെ റെയ്ഡ് തുടരുകയാണ്. ജമ്മുകശ്മീർ സോപോർ പോലീസിന് ലഭിച്ച കൃത്യമായ സൂചനകളുടെ അടിസ്ഥാനത്തിലായിരന്നു റെയ്ഡ് നടന്നത്.

രാഷ്‌ട്രീയ റൈഫിൾസ്, സിആർപിഎഫ് 92 ബറ്റാലിയൻ എന്നിവരുടെ സംയുക്തസംഘമാണ് റെയ്ഡ് നടത്തിയത്. റാഫിയാബാദ് സബ് ഡിവിഷനിലെ നാഥിലാൽ മേഖലയിലാണ് ഭീകരൻ നിലയുറപ്പിച്ചതായി കണ്ടെത്തിയത്. ചെക് സേരി പട്ടാനിലെ ഫിർദൗസ് അഹമ്മദ് വാനിയെന്നയാളെയാണ് ആയുധങ്ങൾ സഹിതം പിടികൂടിയത്. അതേസമയം ജമ്മുകശ്മീർ മേഖലയിൽ ഗ്രനേഡ് ആക്രമണത്തിൽ ഒരാൾ മരിക്കുകയും 33 പേർക്ക് ഞായറാഴ്ച പരിക്കേൽക്കുകയും ചെയ്തിരുന്നു. ഇതിനുപിന്നാലെയാണ് ബാരാമുള്ളയിൽ നിന്നും ഇപ്പോൾ ഭീകരനും പിടിയിലായത്.