ഭീകരാക്രമണ ഭീഷണി! അതീവ ജാഗ്രതയിൽ രാജ്യതലസ്ഥാനം, ബിജെപി ആസ്ഥാനം ഉൾപ്പെടെയുള്ള ഇടങ്ങൾ കനത്ത കാവലിൽ

ദില്ലി :രാജ്യതലസ്ഥാനത്ത് ഭീകരാക്രമണമുണ്ടാകാൻ സാധ്യതയുണ്ടെന്ന രഹസ്യാന്വേഷണ ഏജൻസികളുടെ മുന്നറിയിപ്പിനെത്തുടർന്ന് അതീവ ജാഗ്രതാ നിർദ്ദേശം പുറപ്പെടുവിച്ചു. ദില്ലി പോലീസും മറ്റ് സുരക്ഷാ ഏജൻസികളും നഗരത്തിലുടനീളം നിരീക്ഷണം ശക്തമാക്കിയിരിക്കുകയാണ്. സംശയാസ്പദമായ സാഹചര്യത്തിൽ കാണപ്പെടുന്ന വ്യക്തികളെയോ വാഹനങ്ങളെയോ കർശനമായി പരിശോധിക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്.

സെൻട്രൽ ദില്ലിയിലെ പ്രധാന ഓഫീസുകൾ, തിരക്കേറിയ ചന്തകൾ എന്നിവിടങ്ങളിൽ ചാവേർ ആക്രമണങ്ങൾക്കോ ഐഇഡി സ്ഫോടനങ്ങൾക്കോ സാധ്യതയുണ്ടെന്നാണ് ലഭിച്ചിരിക്കുന്ന വിവരം. ഇതിന്റെ അടിസ്ഥാനത്തിൽ ദീൻ ദയാൽ ഉപാധ്യായ മാർഗിലെ ബിജെപി ആസ്ഥാനം ഉൾപ്പെടെയുള്ള തന്ത്രപ്രധാനമായ ഇടങ്ങളിൽ സായുധ പോലീസിനെ വിന്യസിക്കുകയും ബാരിക്കേഡുകൾ സ്ഥാപിച്ച് വാഹന പരിശോധന കർശനമാക്കുകയും ചെയ്തു. പ്രധാന സർക്കാർ കെട്ടിടങ്ങൾ, മെട്രോ സ്റ്റേഷനുകൾ, മാർക്കറ്റുകൾ എന്നിവിടങ്ങളിൽ ആന്റി സബോട്ടേജ് പരിശോധനകളും പുരോഗമിക്കുകയാണ്.

അടിയന്തര സാഹചര്യങ്ങൾ നേരിടുന്നതിനായി ബോംബ് ഡിസ്പോസൽ സ്ക്വാഡ്, സ്നിഫർ ഡോഗ് യൂണിറ്റുകൾ, ക്വിക്ക് റിയാക്ഷൻ ടീമുകൾ എന്നിവയെ സജ്ജമാക്കിയിട്ടുണ്ട്. ഡൽഹി ഫയർ സർവീസിനും പ്രത്യേക ജാഗ്രതാ നിർദ്ദേശം നൽകി. കഴിഞ്ഞ വർഷം നവംബർ പത്തിന് ചെങ്കോട്ടയ്ക്ക് സമീപം കാറിൽ നടന്ന സ്ഫോടനത്തിൽ 15 പേർ കൊല്ലപ്പെട്ട സംഭവം മുൻനിർത്തി ഇത്തവണ വിട്ടുവീഴ്ചയില്ലാത്ത സുരക്ഷാ ക്രമീകരണങ്ങളാണ് പോലീസ് ഒരുക്കിയിരിക്കുന്നത്. മുതിർന്ന പോലീസ് ഉദ്യോഗസ്ഥർ സ്ഥിതിഗതികൾ നേരിട്ട് വിലയിരുത്തുന്നുണ്ടെന്നും നഗരം പൂർണ്ണമായും സുരക്ഷാ വലയത്തിലാണെന്നും അധികൃതർ അറിയിച്ചു.