റഷ്യ-യുക്രെയ്ൻ യുദ്ധത്തിൽ മൂന്ന് ദിവസത്തെ വെടിനിർത്തൽ! ഭാരതവുമായി ചർച്ച നടത്തിയെന്ന് വ്‌ളാഡിമിർ പുടിൻ

മോസ്കോ: യുക്രെയ്‌നുമായുള്ള യുദ്ധത്തിൽ മൂന്ന് ദിവസത്തെ താൽക്കാലിക വെടിനിർത്തലിന് ധാരണയായതായി റഷ്യൻ പ്രസിഡന്റ് വ്‌ളാഡിമിർ പുടിൻ . രണ്ടാം ലോകമഹായുദ്ധത്തിൽ നാസി ജർമ്മനിക്കെതിരെ സോവിയറ്റ് യൂണിയൻ നേടിയ വിജയത്തിന്റെ സ്മരണ പുതുക്കുന്ന ‘വിജയദിന’ത്തോടനുബന്ധിച്ചാണ് ഈ നിർണ്ണായക തീരുമാനം. വെടിനിർത്തലുമായി ബന്ധപ്പെട്ട് ഇന്ത്യ, ചൈന, അമേരിക്ക എന്നീ രാജ്യങ്ങളുമായി റഷ്യ വിശദമായ കൂടിയാലോചനകൾ നടത്തിയതായും പുടിൻ വ്യക്തമാക്കി. മാനുഷിക പരിഗണന മുൻനിർത്തിയാണ് ഇത്തരമൊരു നീക്കമെന്നും ഇരുവിഭാഗത്തുനിന്നുമായി 1000 തടവുകാരെ വീതം കൈമാറാൻ ധാരണയായതായും അദ്ദേഹം കൂട്ടിച്ചേർത്തു.

യുക്രെയ്‌നിലെ നിലവിലെ സാഹചര്യങ്ങളെക്കുറിച്ചും നയതന്ത്ര കാര്യാലയങ്ങൾ നേരിടുന്ന ഭീഷണികളെക്കുറിച്ചും പ്രധാന പങ്കാളികളായ ഇന്ത്യയോടും ചൈനയോടും റഷ്യ നേരത്തെ വിശദീകരിച്ചിരുന്നു. യുക്രെയ്ൻ തലസ്ഥാനമായ കീവിലെ ഭരണകേന്ദ്രങ്ങൾക്ക് സമീപമാണ് പല രാജ്യങ്ങളുടെയും എംബസികൾ സ്ഥിതി ചെയ്യുന്നത്. യുദ്ധം രൂക്ഷമായാൽ ഈ നയതന്ത്ര കാര്യാലയങ്ങളുടെ സുരക്ഷ അപകടത്തിലാകാൻ സാധ്യതയുണ്ടെന്ന കാര്യം അമേരിക്കൻ ഭരണകൂടത്തെയും ബോധ്യപ്പെടുത്തിയതായി പുടിൻ പറഞ്ഞു. ഈ ചർച്ചകളുടെ ഫലമായാണ് രണ്ട് ദിവസത്തെ അധിക വെടിനിർത്തലും തടവുകാരുടെ കൈമാറ്റവും ഉൾപ്പെട്ട നിർദ്ദേശം ട്രമ്പ് മുന്നോട്ട് വെച്ചത്.

മേയ് അഞ്ചിന് തന്നെ തടവുകാരുടെ കൈമാറ്റം സംബന്ധിച്ച പട്ടിക റഷ്യ യുക്രെയ്ന് കൈമാറിയിരുന്നുവെങ്കിലും അനുകൂലമായ മറുപടി ലഭിച്ചിരുന്നില്ലെന്ന് പുടിൻ ആരോപിച്ചു. എന്നാൽ വിജയദിനത്തിന്റെ പ്രാധാന്യവും മാനുഷിക മൂല്യങ്ങളും കണക്കിലെടുത്ത് വെടിനിർത്തൽ നടപ്പിലാക്കാൻ റഷ്യ തീരുമാനിക്കുകയായിരുന്നു. ഇത്തവണത്തെ വിജയദിന പരേഡിൽ സൈനിക ടാങ്കുകളും മറ്റ് ആയുധശേഖരങ്ങളും പ്രദർശിപ്പിച്ചില്ല. സുരക്ഷാ പ്രശ്നങ്ങൾ കൊണ്ടല്ല ഇതെന്നും, യുക്രൈനിലെ സൈനിക നീക്കങ്ങളിൽ കൂടുതൽ ശ്രദ്ധ കേന്ദ്രീകരിക്കുന്നതിനാണ് പരേഡ് ലളിതമാക്കിയതെന്നും പുടിൻ വിശദീകരിച്ചു. അന്താരാഷ്ട്ര തലത്തിൽ ഇന്ത്യ ഉൾപ്പെടെയുള്ള രാജ്യങ്ങൾ നടത്തുന്ന ഇടപെടലുകൾ യുദ്ധം അവസാനിപ്പിക്കുന്നതിലേക്കുള്ള നിർണ്ണായക ചുവടുവെപ്പായിട്ടാണ് വിലയിരുത്തപ്പെടുന്നത്.