ജമ്മു കശ്മീരിൽ അക്രമം അഴിച്ച് വിട്ട് ഭീകരർ; അന്യസംസ്ഥാന തൊഴിലാളിയെ വെടിവെച്ച് കൊന്നു

ശ്രീനഗർ: ജമ്മു കശ്മീരിൽ അന്യസംസ്ഥാന തൊഴിലാളിയെ ഭീകരർ വെടിവെച്ച് കൊലപ്പെടുത്തി. ബിഹാർ സ്വദേശിയായ 19 കാരനാണ് കൊല്ലപ്പെട്ടത്. ബന്ദിപ്പോര ജില്ലയിൽ ഇന്നലെ രാത്രി 12.30 ഓടെയായിരുന്നു ആക്രമണം.

അജാസ് മേഖലയിലെ സധുനാരയിൽ ഉറങ്ങുകയായിരുന്ന ഇയാളെ വിളിച്ചുണർത്തിയ ശേഷം വെടിവെച്ച് കൊലപ്പെടുത്തുകയായിരുന്നു. ശബ്ദം കേട്ട് ഉണർന്ന മറ്റുള്ളവർ ചേർന്ന് ഇയാളെ ഉടൻ തന്നെ ആശുപത്രിയിൽ എത്തിക്കാൻ ശ്രമിച്ചെങ്കിലും മരിക്കുകയായിരുന്നു. സംഭവത്തിൽ പോലീസ് അന്വേഷണം ആരംഭിച്ചു.

പാക് ഭീകരരാണ് കൊലപാതകത്തിന് പിന്നിൽ എന്നാണ് വിവരം. 75ാം സ്വാതന്ത്ര്യദിനം ആഘോഷിക്കാനാരിക്കെ രാജ്യത്ത് അക്രമം അഴിച്ച് വിടാനാണ് പാക് ഭീകരരുടെ ശ്രമം. ഇന്നലെ രജൗരിയിൽ സൈനിക ക്യാമ്പിന് നേരെ ഭീകരർ ചാവേർ ആക്രമണം നടത്തിയിരുന്നു. ഇതിൽ നാല് സൈനികരാണ് വീരമൃത്യുവരിച്ചത്. തുടർന്ന് രണ്ട് ഭീകരരെ സൈന്യം വധിച്ചിരുന്നു.