തഴക്കര ശ്രീ സുബ്രഹ്മണ്യ സ്വാമിക്കായി ഒരുങ്ങുന്നൂ..മഹാശ്രീകോവിൽ;പണികൾ പുനരാരംഭിച്ചു | Thazhakkara Temple

പുണ്യപുരാതനമായ തഴക്കര ശ്രീ സുബ്രഹ്മണ്യസ്വാമി ക്ഷേത്രത്തിന്റെ ശ്രീകോവിൽ പുനർനിർമ്മാണത്തിന്റെ ഉത്തരം വെയ്പ് ചടങ്ങോടെ നിർത്തി വച്ച പണികൾ പുനരാരംഭിച്ചു. കോവിഡ് മഹാവ്യാധിയുടെ
പശ്ചാത്തലത്തിലാണ് കഴിഞ്ഞ 11 മാസമായി പണികൾ നിർത്തിവെയ്ക്കാൻ നിർബന്ധിതമായത്.

ഒന്നും രണ്ടും ഘട്ടങ്ങൾക്ക് ശേഷം പൂർത്തീകരണത്തിന്റെതായ മൂന്നാം ഘട്ടത്തിൽ പണി പൂർത്തീകരിച്ച് ദേശദേവനും ദേവസേനാപതിയുമായ ഭഗവാനെ അടുത്ത തൈപ്പൂയത്തിന് മുമ്പായി പുതിയ ശ്രീകോവിലിൽ
പ്രതിഷ്ഠിക്കണമെന്നതാണ് ഭരണ സമിതിയുടെ ആഗ്രഹവും തീരുമാനവും.
ഇതിലേക്ക് എല്ലാ ഭക്തജനങ്ങളുടെയും സഹായ സഹകരണവും ഉപദേശനിർദ്ദേശങ്ങളും സർവോപരി സമർപ്പണത്തോടെയുള്ള പ്രാർത്ഥനയും ഉണ്ടാകണം എന്നും ഭരണസമിതി പ്രവർത്തകർ അഭ്യർത്ഥിച്ചു.

ഇപ്പോൾ പണിപ്പുരയിൽ ശ്രീകോവിലിന്റെ പരമപ്രധാനവും, 36 കഴുക്കോലുകൾ സംയോജിപ്പിക്കുന്നതുമായ കൂടത്തിന്റെ പണിയാണ് നടക്കുന്നത്. ഒരു തേക്കിന്റെ ചുവടുഭാഗം ഏകദേശം 4 ക്യൂബിക്കടി തടിയാണ് കൂടം നിർമ്മാണത്തിനാവശ്യം. ശ്രീകോവിലിന്റെ കൂടത്തിന്റെ തടിക്കും നിർമ്മാണ ജോലികൾക്കുമായി ഒന്നര ലക്ഷത്തിലധികം രൂപയാണ്
ചെലവു വരുന്നത്. തഴക്കര കൈലാസത്തിൽ ബി.തങ്കമാണ് കൂടത്തിന്റെ
സമർപ്പണം വഴിപാടായി നടത്തുന്നത്.

ഇന്നലെ കൂടത്തിന്റെ നിർമ്മാണം ഉളികുത്തു ചടങ്ങോടെ ആരംഭിച്ചു. മുഖ്യ ശില്‌പി .ചന്തിരൂർ മോഹനൻ ആചാരിയുടെ മകൻ കർമ്മമോഹനൻ, സുദർശനൻ,ജയപ്രകാശ് എന്നിവരാണ് ഈ നിർമ്മാണ പ്രവർത്തനത്തിൽ ഏർപ്പെട്ടിരിക്കുന്നത്. ഇന്നലെ രാവിലെ പണിപ്പുരയിൽ നടന്ന ചടങ്ങിൽ തങ്കം ശില്പികൾക്ക് ദക്ഷിണ നൽകുകയുണ്ടായി. 36 കഴുക്കോലുകളുടെയും അവസാനഘട്ട പണികളും ഇതോടൊപ്പം നടക്കുന്നുണ്ട്