ലോകത്തിലെ നാലാമത്തേതും, ഏഷ്യയിലെ ഏറ്റവും വലുതുമായ എയർപോർട്ട്! നോയിഡ അന്താരാഷ്ട്ര വിമാനത്താവളം ഈ വർഷത്തോടെ സജ്ജമാകും; അഭിമാന പദ്ധതിയെ കുറിച്ചുള്ള വിവരങ്ങൾ പങ്കുവെച്ച് യോഗി ആദിത്യനാഥ്

ലഖ്‌നൗ: ജെവാറിൽ നിർമ്മാണത്തിലിരിക്കുന്ന നോയിഡ അന്താരാഷ്ട്ര വിമാനത്താവളത്തിന്റെ ആദ്യ റൺവേ ഈ വർഷം അവസാനത്തോടെ സജ്ജമാകുമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ബിജെപിയുടെ അഭിമാന പദ്ധതിയായ നോയിഡ ഇന്റർനാഷണൽ എയർപോർട്ട് പൂർത്തിയായാൽ ലോകത്തിലെ നാലാമത്തേതും, ഏഷ്യയിലെ ഏറ്റവും വലുതുമായ എയർപോർട്ട് എന്ന ബഹുമതി നോയിഡ ഇന്റർനാഷണൽ എയർപോർട്ടിന് സ്വന്തമാകും. ലഖ്‌നൗവിൽ നിന്ന് വാരാണസിയിലേക്കുള്ള ഫ്ലൈറ്റ് സർവീസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ജവാറിലെ നോയിഡ ഇന്റർനാഷണൽ എയർപോർട്ടിന് 2021-ലാണ് പ്രധാനമന്ത്രി നരേന്ദ്രമോദി തറക്കല്ലിട്ടത്. 1,334 ഏക്കർ വിസ്തൃതിയിൽ വ്യാപിച്ചുകിടക്കുന്ന എയർപോർട്ട്, സ്വിസ് കൺസഷനയർ സൂറിച്ച് ഇന്റർനാഷണൽ എയർപോർട്ട് എജിയുടെ അനുബന്ധ സ്ഥാപനമായ യമുന ഇന്റർനാഷണൽ എയർപോർട്ട് പ്രൈവറ്റ് ലിമിറ്റഡാണ് വികസിപ്പിക്കുന്നത്. അതേസമയം, വിമാനത്താവളം യാഥാർത്ഥ്യമാകുന്നതോടെ, ഉത്തർപ്രദേശിലെ മുഴുവൻ സമ്പദ് വ്യവസ്ഥയെ ഉത്തേജിപ്പിക്കാൻ സാധിക്കുന്നതാണ്.